Хятад улсын цар тахалтай тэмцэх “Тэг ковид” стратегийн хамгийн хатуу арга хэмжээ нь халдвар авсан болон хавьтал болсон хүмүүсийг төрийн мэдлийн тусгаарлах байгууламжуудад албадан хорьж, эмчлэх байв.

Тэгвэл тус улсын олон хотод засгийн газрынхаа бодлогыг эсэргүүцсэн иргэдийн жагсаал цуглаан зохион байгуулагдсанаас хойш долоо хоног орчмын дараа энэхүү хатуу арга хэмжээгээ зогсоожээ.

Одоо коронавирусийн халдвар авсан иргэд шинж тэмдэггүй болон шинж тэмдэг хөнгөн хэлбэрээр илэрч байгаа бол гэртээ тусгаарлагдах журамтай болж байна.

Бас улс дотроо зорчих, олон нийтийн газраар явахад иргэдээс шинжилгээний сөрөг хариу шаардахгүй болжээ.

Өчигдөр Хятадын сошиал ертөнц цар тахлын хатуу дэглэмээс чөлөөлөгдсөн иргэдийн баяр хөөрөөр дүүрсэн байна.

Бээжингийн эрх баригчид “Вирустэй цуг амьдрах” дэлхий нийтийн чиг хандлагыг хүлээн зөвшөөрсөн нь дээрх шийдвэрээс харагдаж байгаа юм.

Одоо тус улсад өдөрт 30,000 гаруй халдварын шинэ тохиолдол тогтмол бүртгэгдэж байгаа.

Өчигдөр Хятадын Эрүүл Мэндийн Үндэсний Хорооноос гаргасан мэдэгдэлд сургууль, эмнэлэг, асрамжийн газарт нэвтрэхээс бусад тохиолдолд PCR шинжилгээний сөрөг хариу шаардахгүй болсон, халдвар дэгдсэн тохиолдолд хөл хорионд хот, хорооллыг бүхэлд нь биш, зөвхөн тодорхой барилга, барилгын давхрыг хамруулах, хөл хорионд хамрагдсан хэсэгт таван өдрийн дотор шинэ халдвар нэмж илрээгүй бол автоматаар цуцлах зэрэг бусад шинэ журмуудыг танилцуулжээ.

Цаашдаа ахмад настнуудыг вакцинжуулалтад түлхүү хамруулахад анхаарлаа хандуулахаар болсныг бас зарласан байна.

Арван нэгдүгээр сарын 24-26-ны өдрүүдэд Бээжин, Шанхай, Гуанжоу зэрэг Хятадын томоохон хотуудад “Тэг ковид” бодлогыг эсэргүүцсэн иргэдийн жагсаал цуглаан зохион байгуулагдаж байв.

Үүний дараа эрх баригчид том хотуудад хорио цээрийн дэглэмээ алхам алхмаар сулруулж эхэлсэн юм.

Эх сурвалж: BBC