Лхагва гарагийн үүрээр Германы хууль хүчний байгууллагууд тус улсын орчин үеийн түүхэнд хамгийн том нууц ажиллагаа явуулж, 25 сэжигтнийг баривчилжээ.
150 дэд хэсгээс бүрдсэн баривчлах ажиллагааг Германы 16 мужийн 11-д явуулахад гурван мянган албан хаагч оролцсон байна. Мөн Итали, Австри зэрэг улсуудад ажиллагааг явуулжээ.
Баривчлагдсан сэжигтнүүд нь Рейхстаг буюу парламентын ордныг хүчээр эзэлж, бүгд найрамдах засаглалыг хаант засаглалаар солих зорилготой “Reichsbürger” (Рэйхийн иргэд) экстремист байгууллагын гол гишүүд байсан байна.
“X өдөр” гэж нэрлэгдсэн энэхүү хуйвалдаан амжилттай хэрэгжсэн тохиолдолд Германы язгууртны удам угсаатай Хайнрих XIII гэгч 71 настай эр хаан ширээнд залрах байжээ.
“Reichsbürger” байгууллага өмнө нь цар тахал, вакцины талаар худал мэдээлэл, хуйвалдааны онол тараах зэрэг ажиллагаа явуулж, Германы хууль хүчнийхний хараанд ороод байсан юм.
Энэ оны дөрөвдүгээр сард дээрх байгууллагатай холбоотой этгээдүүд Германы эрүүл мэндийн сайдыг хулгайлах ажиллагаа төлөвлөөд илчлэгдэж байжээ.
Бас Украины дайн, АНУ-ын Капитолын ордонд гарсан нэгдүгээр сарын 6-ны үймээн зэрэгтэй холбоотой хуурамч мэдээллийг онлайн ертөнцөд идэвхтэй тараадаг байсан байна.
Тэд одоогийн Герман улсын хууль дүрэмд захирагдалгүй, татвар төлөлгүй амьдарч, 1871 онд Германд тогтож байсан Хоёрдугаар Рэйхийн засаглалын хэлбэрийг дахин сэргээх төлөвлөгөөтэй байжээ.
Өчигдөр баривчлагдсан сэжигтнүүдийн дотор нэг орос эмэгтэй байсан байна. Түүнийг Хайнрихийн өмнөөс Москвагийн эрх баригчидтай холбоо тогтоох үүрэгтэй байсан гэж Германы прокурорын газар мэдээлсэн юм.
Берлин дэх ОХУ-ын элчин сайдын яам үүнийг няцааж, өөрийгөө ямар нэг террорист болон хууль бус байгууллагатай холбоогүйг өчигдөр гаргасан мэдэгдэлдээ баталжээ.
“Reichsbürger” байгууллагыг 21,000 орчим дэмжигчтэй гэж Германы эрх баригчид тооцоолсон байна. Үүний 5 орчим хувь нь хэт барууны экстремист үзэл санаанд автсан хүмүүс байдаг ажээ.
Эх сурвалж: BBC