Жил бүрийн арванхоёрдугаар сард ОХУ-ын ерөнхийлөгч Владимир Путин гадаад дотоодын олон зуун сэтгүүлчтэй уулзаж, энэхүү арга хэмжээг Москва хотоос телевизээр шууд дамжуулдаг байв.
Хамгийн богинодоо гурван цаг гаруй хугацаанд үргэлжилдэг энэхүү арга хэмжээ Путинийг дахин ерөнхийлөгчөөр сонгогдсон 2012 оноос хойш жил алгасалгүй үргэлжилсэн юм.
Тэгвэл энэ жил уламжлалт хэвлэлийн хурал болохгүйг Кремлиэс өчигдөр мэдэгджээ.
“Шинэ жилээс өмнө ийм арга хэмжээ болохгүй” гэж Кремлийн хэвлэлийн төлөөлөгч Дмитрий Песков сэтгүүлчийн асуултад хариулсан байна. Тэрбээр ингэхдээ ямар нэг тайлбар өгөөгүй юм.
Ерөнхийлөгч сэтгүүлчидтэй уулзаж ярилцах өөр боломжийг хайж буй тухай Песков нэмж хэлжээ.
Үүнээс гадна Путиний жил бүр Оросын парламент, засгийн газарт хандаж үг хэлдэг уламжлалт арга хэмжээний товыг Кремль одоогоор зарлаагүй байна.
Тэр бас жил бүр Оросын иргэдийн асуултад утсаар хариулдаг “Прямая линия с Владимиром Путиным” шууд нэвтрүүлгээ энэ жил зохион байгуулаагүй өнгөрсөн юм.
Уг арга хэмжээ хамгийн сүүлд 2021 оны зургаадугаар сарын 30-нд зохион байгуулагдаж байжээ.
Эх сурвалж: Bloomberg
