Шинэ оны эхний өдрөөс эхлэн Нью-Йорк мужид нас барсан хүний шарилыг бордоо болгон ашиглахыг зөвшөөрсөн хууль хэрэгжиж байна.
Байгальд хамгийн ээлтэй оршуулга гэгдэх болсон энэ аргыг хуулиар зөвшөөрсөн АНУ-ын сүүлийн муж Нью-Йорк болж байгаа юм.
2019 онд Вашингтон муж энэ чиглэлд анхдагч болж байсан бол дараа нь Колорадо, Орегон, Вермонт, Калифорни мужууд дагаж байжээ.
Нью-Йорк нь тэдгээрийн дараа зургаа дахь муж болсон байна.
Энэхүү аргыг хэрэглэсэн тохиолдолд талийгаачийн шарилыг битүү саванд модны үртэс, сүрэл зэрэг материалуудтай хамт сар орчим хугацаанд дардаг. Ингэсний дараа шарил задарсан хөрсийг халдваргүйжүүлж, ариутгаад ар гэрийнхэнд нь өгдөг байна.
Уг хөрсийг цэцэг, мод, ногоо тарихад бордоо болгон ашигладаг юм.
Ийм үйлчилгээ үзүүлдэг Recompose компанийн мэдээлснээр шарилыг бордоо болгох нь чандарлах, булшлахтай харьцуулахад нэг тонн орчим хүлэмжийн хийг агаарт цацагдахаас сэргийлдэг гэнэ.
Бас уламжлалт оршуулгад ашигладаг авс, газар зэрэг байгалийн нөөцийг хэмнэх боломжтой болдог байна.
Шинэ хуулийг батлахад Нью-Йоркийн католик сүм хийдүүд хамгийн их эсэргүүцэж байжээ. Тэд хүнтэй “хог хаягдал” мэт харьцах ёсгүй гэж үзэж байсан гэнэ.
Вашингтон мужийн Сиэтл хотод анхны шарил задлах байгууламжийг ажиллуулж эхэлсэн Recompose компани нэг удаагийн үйлчилгээний зардлыг $7,000-аар тогтоосон байна.
АНУ-ын холбогдох албадын тоо баримтаас үзвэл 2021 онд уламжлалт оршуулгын дундаж зардал $7,848, чандарлах зардал $6.971 байжээ.
Одоогоор бордоо болгох аргыг Швед улсад хуулиар зөвшөөрдөг. Их Британид авсгүй оршуулах, эсвэл биологийн задралд ордог авсанд оршуулах зэрэг байгальд ээлтэй аргуудыг зөвшөөрдөг байна.
Эх сурвалж: BBC
