Гадаадын харьяат иргэд орон сууц худалдаж авахыг хориглох хууль шинэ оны эхний өдрөөс Канадад хэрэгжиж байна.

Энэ нь үл хөдлөх хөрөнгийн үнийн өсөлтийг хязгаарлах, өөрийн иргэдэд хүртээмжтэй болгох зорилготой хууль юм.

Цагаачид болон урт хугацаагаар оршин суух эрхтэй гадаадын иргэдийг энэ хоригоос тодорхой шалгуураар хөнгөлөх юм байна.

2021 оны сонгуулийн үеэр ерөнхий сайд Жастин Трюдо ийм зохицуулалтын эхний саналыг гаргаж байжээ. “Канадын орон сууцнууд ашиг хонжоо хайгчид, чинээлэг корпорацууд, гадаадын хөрөнгө оруулагчдын сонирхлыг татаж байна. Үүний улмаас хоосон, сул орон сууцнууд, цуурхал дам яриа, үнийн хөөрөгдөл зэрэг сөрөг үзэгдлүүд бий боллоо. Орон сууц бол хөрөнгө оруулагчдад бус, хүмүүст зориулагдах ёстой” гэж тэр ярьж байсан юм.

Улмаар сонгуульд ялсныхаа дараа түүний Либерал Ардчилсан нам хуулийн төслөө танилцуулж байжээ.

Энэ хуулиас гадна Ванкувер, Торонто зэрэг том хотууд гадаадын үл хөдлөх эзэмшигчдээс болон хоосон орон сууцнуудаас татвар авах болсон юм.

Өнөөдрийн байдлаар Канадын орон сууцнуудын үнэ ханш түүхэн дээд хэмжээнээсээ буцаж унаад байгаа.

Канадын Үл Хөдлөх Хөрөнгийн Холбооноос гаргасан тоо баримтаас үзвэл 2022 оны эхэнд тус улсын дундаж орон сууцны үнэ 800,000 канад доллар ($590,000) байсан бол өнгөрсөн сард 630,000 канад доллар ($465,000) болж буурчээ.

Гэхдээ Канадын нийт орон сууцнуудын 5 хүрэхгүй хувийг эзэмшдэг гадаадын иргэдийн худалдааг хориглосноор зах зээлийн үнэ ханш хангалттай буурна гэдэгт судлаачид эргэлзэж байгаа юм байна.

Харин оронд нь орон сууцны нийлүүлэлтийг нэмэгдүүлэхэд анхаарал хандуулах хэрэгтэй гэж тэд үзэж байгаа юм байна.

Канадын Моргэйж, Орон сууцны Корпорац 2030 онд тус улсын зах зээлд 19 сая орон сууцны хэрэгцээ бий болно гэсэн тоог өнгөрсөн зургаадугаар сард гаргаж байжээ.

Эх сурвалж: AFP