Вагнер Группийн тэргүүн Евгений Пригожин шоронгийн хоригдлуудыг Украины дайнд илгээхдээ зургаан сарын хугацаанд ямар нэг зөрчил гаргалгүй байлдаж, амьд үлдвэл чөлөөлөх амлалт өгч байсан юм.
Тэрбээр амлалтаа биелүүлж эхний хэсэг хоригдлыг гэрт нь хариулах шийдвэр гаргасныг Оросын хэвлэлүүд өчигдөр мэдээлжээ.
РИА Новости агентлагийн тараасан дүрс бичлэгт Пригожин дүрэм хувцас өмссөн хэсэг эрчүүдийн өмнө зогсоод “Та нар гэрээнийхээ хугацааг амжилттай дуусгаж, албаа нэр төртэй хаалаа” гэж хэлж байгааг харуулсан байна.
Тэрбээр цааш нь хэт ууж согтуурахгүй, хар тамхи татахгүй, эмэгтэйчүүдийг хүчиндэхгүй, аливаа муу зүйлд орооцолдохгүй байхыг тэдэнд сануулаад “хэрвээ тэгвэл нийгмийн хүндлэлийг хүлээх болно” гэж зөвлөжээ.
Prigozhin releases the first batch of Wagner’s convict recruits who managed to survive for 6 months in Ukraine back into their hometowns, instructing Russian police to treat these men with “the greatest respect.” Will they become the new oprichniks as Russia spins into darkness? pic.twitter.com/YYrtaKTF5A
— Yaroslav Trofimov (@yarotrof) January 5, 2023
Хувийн батлан хамгаалах салбарын Вагнер Групп нь анх дайнд оролцож байсан ахмад дайчдыг хөлслөн Ливи, Сири, Төв Африкийн БНУ, Мали зэрэг улсуудад үүрэг гүйцэтгүүлдэг байв.
Харин өнгөрсөн онд Украины дайнд оролцох болсноор хүн хүчний нөөц нь шавхагдаж, Оросын шоронгуудаас сайн дурынхныг элсүүлэх болсон юм.
Вагнер Группийг 2014 онд Пригожин анх ОХУ-ын албан ёсны арми үүрэг гүйцэтгэх боломжгүй тохиолдолд Кремлийн ашиг сонирхлыг хилийн чанадад хамгаалах зорилгоор байгуулж байжээ.
Нийтийн хоолны бизнес эрхэлдэг Евгений Пригожин өмнө нь Кремлийн ордны хүндэтгэлийн зоогийг зохион байгуулах онцгой эрх авсны улмаас “Путиний тогооч” хочтой болж байв.
Эх сурвалж: Aljazeera
