Украины ерөнхийлөгчийн зөвлөх Олексий Арестович алдаатай мэдэгдлийнхээ улмаас огцрох хүсэлт гаргаж байгаагаа өчигдөр мэдэгджээ.
Бямба гарагт Оросын армийн агаарын цохилтод Украины төв бүсийн Днипро хотын есөн давхар орон сууц өртөж, 44 хүний амь үрэгдсэн юм.
Украины агаарын хүчний устгасан Оросын пуужин Днипрогийн барилга дээр унасан гэж Арестович энэхүү цохилтын дараа мэдэгджээ.
Харин сүүлд Украины батлан хамгаалах яам Оросын Х-22 пуужин Днипрогийн барилгыг оносон, түүнийг амдаж устгах боломжгүй байсан гэж мэдэгдсэн нь Арестовичийн тайлбараас зөрсөн юм.
Уурлаж бухимдсан Украинчууд худал мэдэгдэл хийж, Оросын суртал нэвтрүүлэгт ашиглагдсан гэж Арестовичийг буруутгаж байв.
Парламентын зарим гишүүд Арестовичийг албан тушаалаас нь чөлөөлөх шаардлагад гарын үсэг зурж эхэлсэн юм.
Үүний дараа тэр өөрөө огцрох хүсэлтээ гаргаж, “ноцтой алдаа” гаргаснаа хүлээн зөвшөөрчээ.
“Оросын пуужинд орон сууцны барилга оногдсон талаар миний дутуу, алдаатай тайлбарт гомдсон хүмүүсээс болон амь үрэгдэгсдийн төрөл төрөгсөд, Днипро хотын оршин суугчдаас чин сэтгэлийн уучлалт гуйж байна” гэж Арестович сошиал хуудсандаа бичсэн байна.
Арестович бол Украины дайны үеэр дэлхий дахинд хамгийн их танигдсан Киевийн албаны хүмүүсийн нэг юм.
Тэрбээр 1.6 сая дагагчтай YouTube сувагтай бөгөөд нийтэлсэн мэдэгдэл бүр нь 200,000-аас дээш тооны үзэлттэй байдаг.
Үнэхээр Арестовичийн хэлсэн үгийг Оросын тал Днипрод болсон үйл явдлын талаар мэдэгдэлдээ ашиглаж эхэлсэн юм.
Тухайлбал Кремлийн хэвлэлийн төлөөлөгч Дмитрий Песков армийнх нь харвасан пуужин орон сууцны барилгыг оноогүй, Украины агаараас хамгаалах системийн алдаа байсан байж болзошгүй гэж мэдэгдэж байжээ.
Украины ерөнхийлөгч Володимир Зеленский одоогоор Арестовичийн огцрох хүсэлтийн талаар ямар нэг байр суурь илэрхийлээгүй байна.
Эх сурвалж: BBC