Намынхаа жил тутмын хурлын үеэр өнөөдөр Шинэ Зеландын ерөнхий сайд Жасинда Ардерн огцрох шийдвэрээ гэнэт зарлажээ.

“Ийм чухал албан тушаал өндөр хариуцлага шаарддаг. Үүнд хэзээ явах, хэзээ өөр хүнд зайгаа тавихаа мэдэх хариуцлага хүртэл багтдаг юм. Би энэ ажилд ямар шаардлага тавигддагийг сайн мэднэ. Харин одоо надад уг ажлыг шударгаар гүйцэтгэх хангалттай нөөц бололцоо үлдээгүйг би мэдэрч байна. Энэ бол ийм энгийн зүйл” гэж тэр тайлбарласан байна.

Ардерн цааш нь ярихдаа “Би бол хүн. Улс төрчид бол жирийн хүмүүс. Бид чадлынхаа хэрээр ажилладаг. Харин одоо цаг нь болсон. Миний хувьд явах цаг боллоо” гэж хэлжээ.

Жасинда Ардерн 2017 онд 37 настайдаа ерөнхий сайд болсон нь тухайн үедээ дэлхийн хамгийн залуу төр засгийн тэргүүнд тооцогдож байв.

Түүний засаглалын жилүүдэд Шинэ Зеланд улс цар тахлыг давж, хэд хэдэн том террорист халдлагатай тулгарч байв. Бас Уайт Айландад галт уул дэлбэрч, байгалийн томоохон гамшиг нүүрлэж байлаа.

“Би Шинэ Зеландчуудад удирдагч хүн зөөлөн мөртлөө хүчтэй, өрөвч мөртлөө шийдэмгий, өөдрөг боловч нягт хариуцлагатай байх ёстой гэсэн итгэл үнэмшлийг үлдээсэн гэж найдаж байна. Мөн цаг нь болохоор явж чаддаг байх ёстойг ойлгуулсан байх” гэж Ардерн хэлжээ.

Шинэ Зеландын дараагийн ерөнхий сайд хоёрдугаар сарын 7-ноос өмнө тодрох юм байна.

Эх сурвалж: The Guardian