Хятад улсын хүн амын 80 орчим хувь коронавирусийн халдвар авсан тул цар тахлын хоёр дахь давлагаа өргөн хүрээнд үүсэхгүй гэж үзэж байгаагаа тус улсын мэргэжилтнүүд Ням гарагт мэдээлжээ.

Сүүлийн нэг долоо хоногийн хугацаанд бараг 13,000 орчим хүн нас барсныг бас мэдээлсэн байна.

Тухайлбал нэгдүгээр сарын 13-наас 19-ний хооронд долоо хоногийн хугацаанд Covid-19 өвчний улмаас 12,658 хүн нас барсныг Хятадын Халдварт Өвчний Хяналт, Урьдчилан Сэргийлэх Төв өчигдөр мэдээлжээ.

“Тэг ковид” стратегиасаа татгалзсаны дараа арванхоёрдугаар сарын 8-наас нэгдүгээр сарын 12-ны хооронд 60,000 орчим хүн нас барсныг тус байгууллага өмнө нь мэдээлж байсан юм.

Сар шинийн баярын үеэр Хятадын хөдөө орон нутагт өвчлөл, эндэгдэл нэмэгдэх магадлалтайг мэргэжилтнүүд анхааруулжээ.

Гэхдээ нэгэнт хүн амын 80 орчим хувь халдвар авсан тул сарын шинийн баяраар үүсэх халдварын давлагааны цар хүрээ тийм өргөн байж чадахгүй гэж дүгнэсэн байна.

Цар тахал эхэлсэн цагаас хойш Хятадын ард иргэд анх удаагаа сар шинийн уламжлалт баяраа ямар нэг хорио цээрийн хязгаарлалтгүй тэмдэглэж байгаа.

Бямба гарагт эхэлсэн баяр долоо хоног үргэлжлэх юм. Энэ үеэр дэлхийд хамгийн томд тооцогдох хотоос хөдөө орон нутгийг чиглэсэн хүн амын асар том шилжилт хөдөлгөөн үүсдэг.

Хятадын тээврийн яам энэ жилийн сар шинийн баяраар иргэд 5 тэрбум удаагийн аялал хийх тооцоо гаргасан нь өнгөрсөн оныхоос бараг хоёр дахин өссөн байна.

Зөвхөн Бямба гарагт буюу битүүний өдөр Хятадын дотоодын нислэгийн чиглэлүүдэд 800,000 хүн зорчсон нь 2022 оны энэ өдрийнхөөс хоёр дахин өсжээ.

Эх сурвалж: South China Morning Post