Өнгөрсөн долоо хоногт Их Британийн BBC агентлаг “India: The Modi Question” нэртэй баримтат кино бүтээснээ нийтэд үзүүлж эхэлсэн юм.
Гэтэл энэхүү баримтат киног болон түүний YouTube сүлжээнд тавигдсан хэсгүүдийг Энэтхэгийн эрх баригчид нутаг дэвсгэртээ үзүүлэхийг хоригложээ.
2021 онд батлагдсан IT Rule журмын хүрээнд контентуудыг хориглосноо Энэтхэгийн Өргөн Нэвтрүүлэг, Мэдээллийн Яамны зөвлөх Канчан Гупта өнгөрсөн Бямба гарагт мэдээлсэн байна.
Нэгдүгээр сарын 17-нд цацагдсан энэхүү баримтат кинонд Энэтхэгийн ерөнхий сайд Нарендра Модитой холбоотой эмзэг түүхийн талаар баримт дэлгэсэн нь хаагдах шалтгаан болжээ.
Моди улс төрд ороод удаагүй байхдаа Энэтхэгийн баруун бүсийн Гужарат мужийн захирагч байсан юм. 2002 онд Гужаратад гарсан шашин хоорондын томоохон мөргөлдөөнд Моди гол үүрэгтэй оролцсон тухай дээрх баримтат кинонд өгүүлжээ.
Тухайн үед Хиндү шашны мөргөлчдийг тээвэрлэж явсан галт тэрэгт гал түймэр гарсны улмаас 59 хүний амь үрэгдэж байв.
Энэ явдлын дараа Хиндү шашинтнууд нутгийн Ислам шашинтнуудыг буруутгаж, томоохон мөргөлдөөн гарахад 1,000 гаруй хүн алагдаж байжээ. Хохирогчдын ихэнх нь муслимууд байв.
Тухайн үед эрх баригч Хиндү шашны Бхаратия Жаната намын улс төрч байсан Нарендра Моди үймээнийг зохицуулах гэсэн цагдаагийн хүчийг буцаан татаж, оронд нь Хиндү шашны экстремистүүдийг татан оролцуулж байсан байна.
Энэ үеэр муслим эмэгтэйчүүдийг хүчиндэх давлагаа өрнөж, үндсэндээ Хиндү шашинтнуудын амьдардаг нутгаас муслимуудыг цэвэрлэх зорилготой залхаан цээрлүүлэх ажиллагаа болж байжээ.
BBC агентлагийн баримтат кинонд 2002 оны мөргөлдөөнд одоогийн ерөнхий сайд Нарендра Моди гол үүрэгтэй оролцсон тухай баримтуудыг дэлгэсэн юм.
Баримтат киноны хоёрдугаар бүлэг нэгдүгээр сарын 24-ний өдөр цацагдана. Пүрэв гарагт Энэтхэгийн гадаад хэргийн яам уг баримтат киног улс төрийн “суртал нэвтрүүлгийн нэг хэсэг” гэж мэдэгдэж байжээ.
Харин BBC агентлаг баримтат киногоо сэтгүүл зүйн өндөр стандартын дагуу бүтээгдсэн гэж тайлбарлаад байна.
Гужаратын мөргөлдөөний үеэр Их Британийн гурван иргэн амь үрэгдэж байжээ. Британийн засгийн газар Нарендра Модиг энэхүү эмгэнэлт явдалтай холбогдуулан 10 жилийн хугацаатай хоригоор шийтгэсэн нь 2013 онд өндөрлөж байв.
Эх сурвалж: Aljazeera
