Нийслэлийн Засаг дарга бөгөөд Улаанбаатар хотын Захирагч Д.Сумъяабазар болон холбогдох албаны хүмүүс БНХАУ-ын Чунчин хотод албан томилолтоор ажиллаж байна. Энэ үеэр тус хотын LRT, метро, монорейл зэрэг масс тээврийн туршлагыг судлан, танилцжээ.
Тэрбээр "Нэг саяас дээш хүн амтай хотод метро болон хөнгөн галт тэрэг явуулах асуудал яригддаг. Улаанбаатар хот 1.6 сая хүн амтай. Хотын түгжрэлийг бууруулах ажлын хүрээнд хөнгөн галт тэрэг буюу багтаамж ихтэй нийтийн тээврийг явуулах цаг нь болсон.
Өнгөрсөн хоёр жилийн хугацаанд олон улсын технологийг нэвтрүүлэх судалгаанууд хийгдсэн. Япон, Германаас хөнгөн галт тэрэг авах гэхээр Хятадынхаас 2-3 дахин илүү үнэтэй байдаг.
Европын стандартыг нутагшуулсан Хятадын сүүлийн үеийн хөнгөн галт тэрэг/LRT/, метроны үйлдвэрлэлтэй танилцаж, сууж үзлээ. Улаанбаатар хотод хосолсон нийтийн тээврийн хэрэгсэл явуулах нь зөв гэж үзсэн. Эхний ээлжид хөнгөн галт тэрэгний ТЭЗҮ-г боловсруулаад гар дээрээ авсан байгаа.
Шинэ нисэх буудлыг хотын төвтэй холбох, тогтмол цагт явдаг хөнгөн галт тэрэг нэн шаардлагатай.
Монорейл буюу богино зайд явдаг, дуу чимээ багатай, резинэн дугуйтай Канадын технологиор үйлдвэрлэсэн хот доторх вагоныг LRT-тэй хослуулж явуулбал зөв юм гэсэн дүгнэлтэд хүрсэн. Чунчин хотын энэ үйлдвэрээс LRT, монорейлийг үйлдвэрийн үнээр нийлүүлэх боломжийн талаар ч хэлэлцлээ" гэсэн мэдээллийг өглөө.
Чунчин хотын Метро үйлдвэрийн дэд захирал Хуа Жинфей "40 хэмийн хүйтэн нөхцөлд орон нутагт амжилттай туршиж хийсэн. Дэлхийн олон хотод монорейл ашиглагдаж байгаа. Ялангуяа Япон улсын долоон хотод монорейл явдаг" гэв.
"Улаанбаатар шинэ бүтээн байгуулалт" ХХК-ийн ерөнхий инженер Г.Сумхүү "Метрог гурван сая буюу түүнээс дээш хүн амтай хотод ашигладаг. Манай улсын хувьд эдгээр тээврийн хэрэгслээс цаг уур болон технологийн нөхцөлийг харж сонгох нь зүйтэй байх. БНХАУ-ын Чунчин хотод метро, LRT, монорейл ашиглагдаж байна.
Монорейл нь маш бага зайд маневр хийх шийдэлтэй тээврийн хэрэгсэл. Хүн амын нягтаршил, барилга байгууламжийн ойртолтын зайтай холбоотойгоор тулгуурт гүүрэн байгууламжийг ашигласан давуу талтай. Хөдлөх бүрэлдэхүүний эд ангиараа ялгарна. Монорейл резинэн дугуйтай бол LRT төмөр дугуйтай.
Хятадын талаас монорейлийг санал болгож байна. Бид аюулгүй байдал, монгол орны цаг агаарын нөхцөлд тохирох эсэх, боловсон хүчний нөөц бололцоогоо судалж байж сонгоно" хэмээн ярилаа.
