Украины дайны үеэр Оросын талын үйлдсэн гэмт хэргийг мөрдөх зорилготой АНУ-ын Conflict Observatory байгууллага өчигдөр судалгааны шинэ тайлангаа танилцуулжээ. Йелийн их сургуулийн судлаачид оролцсон энэ байгууллага АНУ-ын төрийн департаментын дэмжлэгтэй үйл ажиллагаа явуулдаг юм.
Уг тайланд өгүүлснээр Украины 6,000 гаруй хүүхэд одоо ОХУ-ын нутаг дэвсгэр болон Оросын эзэлсэн бүс нутагт гэр бүлээсээ тусгаарлагдаж, “дахин боловсрол олгох” хөтөлбөрт хамрагдаж байгаа гэнэ.
Украинд дайн эхэлснээс хойш дөрвөн сараас 17 хүртэл настай хүүхдүүдийг Оросын тал гэр бүлээс нь салган ийм хөтөлбөрт хамруулах болжээ.
Москвагийн эрх баригчид тэдний ихэнхийг дайнд өнчирсөн хүүхдүүд гэж тайлбарлаж байгаа.
“Бодит тоо 6,000-аас нэлээд өндөр байх магадлалтай. Ихэнх тохиолдолд тэднийг зуны зусланд амраах нэрээр авч явдаг ч сүүлдээ гэрт нь хариулалгүй, эцэг эхээс нь бүрэн салгадаг байна. Путин энэ аргаараа Украины ирээдүйг хулгайлахыг зорьж байна” гэж АНУ-ын төрийн департаментын хэвлэлийн төлөөлөгч Нэд Прайс мэдэгджээ.
Дээрх тайланд мэдээлснээр ОХУ-ын нутаг дэвсгэр болон 2014 онд эзлэгдсэн Крымд нийтдээ 43 боловсрол олгох төвийг Украины хүүхдүүдэд зориулан байгуулсан байна.
Эдгээрт эх оронч хүмүүжил, боловсрол олгох түүх, соёл, нийгмийн хичээлүүд ордог тухай тайланд мэдээлжээ.
Оросын эрх баригчид Украин хүүхдүүдийг хууль бусаар барьцаалж, өөрийн иргэдэд үрчлүүлэх ажиллагаа явуулж буй талаар НҮБ-д суугаа Украины элч төлөөлөгч Сергей Кислица өнгөрсөн оны тавдугаар сард мэдэгдэж байсан юм.
Эх сурвалж: Reuters
