Болгар, Унгар, Румын улсуудын нутаг дэвсгэрээс олдсон Ямная соёлын булшнуудыг судалсан эрдэмтэд хүмүүс адууг уналга эдэлгээнд ашиглаж байсан хамгийн эртний баримтыг олж тогтоосноо мэдээлжээ.
Тухайлбал дээрх нутаг дэвсгэрт амьдарч байсан хүмүүс одоогоос 5,000 орчим жилийн өмнө морь унаж байсан байна.
Энэ нь өнөөдрийн Казахстан улсын нутаг дэвсгэрт оршиж байсан Ботай хүмүүс анх адууг гаршуулсан гэх онолыг үгүйсгэж байгаа юм.
Баасан гарагт “Science Advances” шинжлэх ухааны сэтгүүлд нийтлэгдсэн судалгааны тайланд “булшнуудаас олдсон хүмүүсийн ясны морфологийн өөрчлөлт, морь унахтай холбоотой өвөрмөц эмгэгүүд” тэднийг хамгийн эртний морьтнууд байсныг баталж буй тухай бичжээ.
Ямная соёл өнөөгийн Зүүн Европ, Евразийн баруун хэсэгт зэс чулууны үеэс хүрэл зэвсгийн эхэн үе хүртэл оршин тогтнож байсан гэдэг.
Эх сурвалж: Science Advances
