Өмнөд Солонгосын засгийн газар одоо үйлчилж буй 52 ажлын цагтай долоо хоногийн системээ сайжруулж, шинэчлэх төлөвлөгөөг өнөөдөр өглөө зарлажээ.
2018 онд анх танилцуулсан одоогийн системийн дагуу байгууллагуудад ажилтнуудаа долоо хоногийн илүү цагийн хэмжээг 12 цагаас хэтрүүлэхгүйгээр нийтдээ 52 цаг ажиллуулахыг зөвшөөрдөг. Өөрөөр хэлбэл долоо хоногийн таван ажлын өдрийн стандарт 40 цаг дээр 12 хүртэл илүү цаг нэмэгддэг. Энэ нь жилийн бүх саруудад адил тэгш үйлчилдэг.
Харин үүнийг шинэчлэн өөрчилснөөр байгууллагууд хүнээ ажиллуулах цагийн дээд хязгаарыг зөвхөн сараар хэмжихгүй, улирлаар, жилээр хэмжих боломжтой болох юм.
Өөрөөр хэлбэл ажил ихтэй үед түлхүү ажиллуулж, багатай үед богино цагаар ажиллуулах уян хатан нөхцөлийг тусгахаар болжээ.
Шинэчилсэн журмаар долоо хоногт ажиллах дээд хугацаа 69 цаг болж өөрчлөгдөх ч жилийн дундаж нь 52 цаг хэвээр хадгалагдах ёстой гэнэ.
Мөн дараалсан ажлын өдрүүдэд 11 цаг тутамд амралтын завсарлага заавал гаргахаар тусгажээ.
Энэ тохиолдолд ажлын ачаалал ихтэй саруудад ердийнхөөс илүү олон цагаар ажиллаад ажлын ачаалал багатай саруудад цөөн цагаар ажиллах боломжтой болох юм. Гэхдээ нэг жилийн хугацаанд долоо хоногийн дундаж нь 52 цагаас хэтрэх ёсгүй.
“Шинэчилсэн систем нь дөрвөн ажлын өдөртэй долоо хоног зэрэг бусад янз бүрийн цагтай ажлын горимуудад хүмүүсээ ажиллуулах уян хатан нөхцөлийг байгууллагуудад олгох юм” гэж Өмнөд Солонгосын хөдөлмөрийн сайд И Жон Сик өнөөдөр болсон хэвлэлийн хурлын үеэр хэлжээ.
Шинэ хуулийн төсөл дээр олон нийтийн саналыг авах 40 хоногийн хугацаа өнөөдрөөс эхэлж байгаа юм байна.
Үүний дараа шинэ хуулийн төслийг ирэх зун Үндэсний Ассамблейн чуулганаар хэлэлцүүлж батлуулах гэнэ.
Эх сурвалж: Yonhap News
