Хунтайж Харри, түүний гэргий Меган нарын хүүхдүүдэд язгууртны хэргэм зэрэг олгосон талаар албаны эх сурвалжууд Лхагва гарагт мэдээлжээ.
Их Британийн хааны гэр бүлээс туурга тусгаарлаж, хэргэм зэргээсээ татгалзсан хүмүүсийн хүүхдэд ийм боломж бий эсэх нь өчигдрийг хүртэл тодорхойгүй байсан юм.
Ингэснээр Харри, Меган нарын гурван настай хүү Арчи хунтайж, нэг настай охин Лилибет гүнж хэргэмтэй болж байна.
“Гүнж Лилибет Дайанаг гуравдугаар сарын 3-ны Баасан гарагт Лос-Анжелесын сүмийн хамба Жон Тэйлор загалмайлсныг би дуулгахдаа таатай байна” гэж хосын хэвлэлийн төлөөлөгч өчигдөр мэдэгджээ.
Букингэмийн ордны захиргаа Арчи, Лилибет нарын хэргэмийг албан ёсны вэб сайтдаа удахгүй нэмж оруулах тухай бас мэдээлсэн байна.
Хоёр жилийн өмнө хэвлэлд өгсөн ярилцлагадаа Меган хүүд нь хэргэм зэрэг олгохоос Британийн хааны гэр бүл татгалзсан тухай ярьж байжээ. Тэр бас хүүгийнх нь арьсны өнгөний талаар яриа тус гэр бүлийн дотор өрнөж байсныг энэ үеэр дурссан юм.
Британийн хаан ширээг залгамжлагчдын эрэгтэй талын ач нарт хунтайж, гүнж хэргэм олгож байх дэг журам 1917 онд Тавдугаар Жорж хааны үед тогтож байжээ. Гэхдээ үүнийг хэрэгжүүлсэн анхны тохиолдол энэ юм байна.
Их Британийн шинэ хаан Гуравдугаар Чарльзыг хаан ширээнд залах ёслол тавдугаар сард тохионо. Гэр бүлээсээ тангараг тасарсан Харри энэхүү арга хэмжээнд оролцох эсэх тодорхойгүй байна.
Эх сурвалж: Reuters
