ОХУ-ын ерөнхийлөгч Владимир Путин өнгөрсөн амралтын өдрүүдэд Украины эзлэгдсэн нутгаар аялсан нь ховор сонин үйл явдал байлаа.
Тэрбээр Бямба гарагийн орой ОХУ-д нэгтгэсний 9 жилийн ойн өдрийг нь давхцуулан Крымийн хойгт очсон байна.
Харин Ням гарагийн өглөө Азовын тэнгисийн боомт Мариуполь хотод зочилсон нь Донбассын эзлэгдсэн бүс нутагт хөл тавьсан анхны тохиолдол болжээ.
Мариуполь хотыг өнгөрсөн онд Оросын зэвсэгт хүчин олон хоногийн турш бүсэлж, газрын хөрстэй тэгшилж байв. Энд Украины дайны хамгийн урт, хамгийн их цус асгаруулсан тулаан болж байлаа.
ОХУ-ын засгийн газрын шадар сайд Марат Хуснуллин хотын сэргээн босголтын ажлын явцын талаар Путинд илтгэжээ. Путин энэ үеэр Мариуполийн зарим дүүргүүдтэй танилцаж, оршин суугчидтай ярилцжээ.
Өнгөрсөн Баасан гарагт Нидерландын Гааг хотод төвтэй Олон Улсын Эрүүгийн Шүүх дайны гэмт хэрэгтэй холбогдуулан Путинийг баривчлах шийдвэр гаргасан билээ.
Өнөөдөр БНХАУ-ын дарга Ши Жиньпин Москва хотод айлчилж, Путинтэй уулзах юм. Өрнөдийн зэр зэвсгийн тусламжийг авч, эдгээрийг ажиллуулах хүн хүчээ бэлдэж дууссаны дараа Украины арми сөрөг довтолгоонд орохоор бэлдэж байгаа гэсэн мэдээлэл бий.
Эх сурвалж: Business Insider