Талибан хөдөлгөөний удирдагч Афганистаны засгийн газрын албан тушаалтнуудад ажилд авсан хүүхдүүдээ халах даалгавар өгчээ.
Хибатуллах Ахундзадагийн гаргасан тушаалд засгийн газрын албан тушаалд томилсон үр хүүхдүүд, гэр бүлийн хүмүүсээ чөлөөлөх, цаашдаа ойр төрлийн хүмүүсээ ажилд авахгүй байх шаардлагыг тусгасан байна.
2021 онд Афганистаны засгийн эрхийг авахдаа Талибаны дэглэм төрийн алба хаших боловсон хүчний ихээхэн хомсдолтой тулгарч байв.
Тухайн үед энэ талын туршлагагүй, ойр төрлийн хүмүүсээ төрийн албан тушаалуудад ихэвчлэн томилдог байжээ.
Саяхан Талибаны хэд хэдэн өндөр албан тушаалтан өөрсдийн хөвгүүдээ төрийн албанд томилсон тухай мэдээ цацагдаж байв.
Афганистан улсын эдийн засаг Талибаны дэглэм тогтсоны дараа эрс муудаад байгаа.
Олон улсын тусламжууд зогсож, эдийн засгийн хоригууд үйлчилж эхэлсэн нь үүнд гол нөлөөлж байна. Тус улс байгалийн хий, зэс, газрын ховор элементийн $1 их наядыг давах хэмжээний эрдэс баялгийн нөөцтэй гэгддэг.
Гэвч аюулгүй байдлын баталгаа муу учраас энэ нөөцөө баялаг болгох гадаадын хөрөнгө оруулалтыг татаж чадахгүй байгаа юм.
Эх сурвалж: BBC
