Өнгөрөгч 7 хоногт Хөгжлийн банкны гурав дахь шатны сонсгол болсон. Тус сонсголоор Хөгжлийн банкны санхүүжилтээр хөдөө аж ахуй, хөнгөн үйлдвэр, ноос ноолуур, оёдол, хүлэмжийн аж ахуйн салбарт олгосон зээлийн талаар хэлэлцсэн юм.
Энэ үеэр "Грийн Сити Гарден" ХХК зээлийн гэрээгээ зөрчсөн тухай дүгнэлтийг шинжээч танилцуулсан. Тодруулбал Хөгжлийн банкны санхүүжилтээр Голомт банкаар дамжуулж "Грийн Сити Гарден" ХХК өвлийн хүлэмж байгуулах төслийн хүрээнд 8.2 тэрбум төгрөгийн зээлийг авсан. Ингэхдээ 2.5 тэрбум төгрөгийг хадгаламжийн дансанд байршуулсан байна.
"Грийн Сити Гарден" ХХК-ийн гүйцэтгэх захирлаар Ж.Эрхэмбаяр ажилладаг бөгөөд түүний хувьд Цахим хөгжил, харилцаа холбооны дэд сайд Ж.Эрхэмбаатарын төрсөн ах юм. Ж.Эрхэмбаатар нь Дэд сайд болохоосоо өмнө Хөгжлийн банкны дэд захирлаар ажиллаж байсан бөгөөд өөрийн хүсэлтээр ажлаа өгсөн байдаг.