Кремлийн ордны захиргаа мэдээллийн аюулгүй байдлын үүднээс энэ сард багтаан iPhone гар утаснаасаа салах даалгаврыг ОХУ-ын зарим төрийн албан хаагчдад өгсөн тухай тус улсын Коммерсант сонин мэдээлжээ.
iPhone гар утсаа Android, Хятадын компаниудын үйлдлийн систем, Оросын өөрийнх нь Open Mobile Platform компанийн хөгжүүлсэн Aurora үйлдлийн системүүдийн аль нэг дээр ажилладаг гар утсаар солих ёстой гэнэ.
“Зөвхөн iPhone-той холбоотой чиглэл өгсөн. Нэг бол хаях, эсвэл хүүхдүүддээ шилжүүлж өгөх болоод байна” гэж энэ сарын эхээр Москва орчимд зохион байгуулагдсан семинарт оролцсон нэг төрийн албан хаагч ярьжээ.
Энэхүү арга хэмжээний үеэр шийдвэрийг танилцуулж байсан гэнэ.
ОХУ-ын ерөнхийлөгчийн тамгын газрын тэргүүн дэд дарга Сергей Кириенко бас албан хаагчдадаа дөрөвдүгээр сарын 1-нээс өмнө iPhone утаснаасаа салах даалгавар өгснийг өөр нэг эх сурвалж баталжээ.
Украинд эзлэн түрэмгийлэх дайн эхэлсний дараахан Apple компани бүтээгдэхүүнээ ОХУ-д нийлүүлэхийг зогсоож байв.
Гэвч үүний дараа ч Оросын иргэд гадаад орнуудаас дамжуулан хувийн шугамаар iPhone бүтээгдэхүүнийг худалдаж авсаар байсан юм.
Дээрх шийдвэрийн талаар Кремлийн хэвлэлийн төлөөлөгч Дмитрий Песковоос тодруулахад “Android, iOS аль ч үйлдлийн системтэйгээсээ үл хамаараад ухаалаг гар утас бол нэлээд тунгалаг, нээлттэй механизмтай эд юм. Тиймээс ухаалаг гар утсыг төрийн албанд ашиглах нь үндсэндээ зохимжгүй” гэж хариулжээ.
Эх сурвалж: Коммерсант
