Опиоид фентанил төрлийн мансууруулах бодисыг Номхон далайгаар тээвэрлэх хууль бус үйл ажиллагаанд хяналт тавихад тусламж үзүүлэхийг хүссэн утгатай захидлыг Хятадын төрийн тэргүүн Ши Жиньпинд илгээснээ Мексикийн ерөнхийлөгч Андрес Мануэл Лопез Обрадор өчигдөр мэдээлжээ.
Тэрбээр өчигдөр болсон хэвлэлийн хурлын үеэр бичсэн захидлаа сэтгүүлчдэд уншиж танилцуулсан байна.
Сүүлийн жилүүдэд энэ төрлийн мансууруулах бодисын тунг хэтрүүлсний улмаас амь насаа алдах явдал АНУ-д нэмэгдэж байгаа бөгөөд Бүгд Найрамдах намын улс төрчид үүнд хөрш Мексик улсыг эрх баригчдыг буруутгах болсон юм.
Опиоид фентанилын найрлагад ордог түүхий эдийг Азийн орнуудаас Мексикт хямд үнээр нийлүүлдэг гэсэн мэдээлэл бий.
АНУ-ын зарим улс төрчид мансууруулах бодисын үйлдвэрлэлийг зогсоох тал дээр засгийн газар нь арга хэмжээ авахгүй байгаа Мексик улсад цэргийн хүч оруулж, өөрсдөө арга хэмжээ авах хатуу шийдлийг хүртэл уриалдаг болоод байгаа.
Тэгвэл Обрадор захидалдаа улсынх нь дотоод хэрэгт оролцож буй АНУ-ын эрх баригчдын талаар Ши Жиньпинд гомдол мэдүүлжээ.
“Ши Жиньпин дарга аа, би ийм бүдүүлэг заналхийллийг няцаахад танаас дэмжлэг хүсэх гэсэндээ биш, харин Азиас манай улс руу илгээдэг фентанилын тээвэрлэлтийг хянахад хүмүүнлэг ёсны үүднээс туслаач гэж хүсэх гэсэн юм” гэж Обрадор захидалдаа бичсэн байна.
Номхон далайгаар Мексикт тээвэрлэгдэн ирж буй фентанилын хэмжээ, хэзээ хаанаас хэн илгээсэн талаар болон бусад нарийн мэдээлэл олж өгөхийг тэр Хятадын төрийн тэргүүнээс хүссэн тухайгаа энэ үеэр мэдээлжээ.
Эх сурвалж: Reuters
