Өнгөрсөн долоо хоногт Хятад улсад айлчилсныхаа дараа Францын ерөнхийлөгч Эммануэл Макрон маргаантай мэдэгдэл хийсэн нь дэлхий нийтийн анхаарлыг татаад байгаа.
Тэгвэл Лхагва гарагт тэр өмнөх мэдэгдлээ бататгасан байр суурь илэрхийлжээ.
Нидерландад хийсэн айлчлалынхаа төгсгөлд тэрбээр Франц улс цаашдаа Тайванийн “статус кво”-г дэмжсэн хэвээр байх ч Европ тив Бээжин, Вашингтоны зөрчилд хутгалдаж, аль нэг талд нь гарах шаардлагагүйг дахин илэрхийлсэн байна.
“Холбоотон байх гэдэг нь дагуул улс байна гэсэн ойлголт биш. Өөрөөр хэлбэл бид өөрийн бодолтой байх ёсгүй гэсэн үг биш юм” гэж Нидерландын ерөнхий сайд Марк Руттетэй хамтарсан хэвлэлийн хурлын үеэр Макрон мэдэгджээ.
“Франц улс Тайванийн статус квог дэмжинэ. Бас Нэг Хятад бодлогыг дэмжиж, нөхцөл байдлыг эвээр шийдвэрлэх арга замыг хайх болно” гэж тэр нэмж хэлсэн юм.
Тайванийн талаар маргаантай байр суурь илэрхийлсний дараа АНУ-ын ерөнхийлөгч асан Дональд Трамп “Миний найз Макрон одоо Хятадын талд орж, бөгсийг нь үнсэж байна” гэж саяхан хэлж байв.
Энэ талаар асуултад хариулахдаа Макрон “Ерөнхийлөгч асан Трамп энэ зөрчлийн нэг талыг төлөөлж буй хүн тул түүний мэдэгдэлд би хариулах шаардлагагүй” гэж хэлжээ.
Гадаад болон дотоодын улс төрийн нөхцөл байдлын улмаас нэлээд дарамт шахалт амсаж буй Макрон сүүлийн 23 жилийн хугацаанд Нидерланд улсад төрийн айлчлал хийсэн Францын анхны ерөнхийлөгч болж байгаа.
Макрон тэтгэврийн насыг 62-оос 64 болгон хойшлуулах шинэчлэлт эхлүүлсэн нь Францын нийгэмд маш их бухимдал үүсгэсэн юм. Нидерландын айлчлалын үеэр түүнийг дотоодын асуудал нь ч дагасаар байлаа.
Түүнийг Амстердамын их сургуульд зочлох үеэр эсэргүүцэл илэрхийлсэн хоёр хүнийг Нидерландын цагдаа нар баривчилжээ.
Макроныг сургуулийн байрнаас гарч явах үед гудамжинд 40 орчим хүн эсэргүүцлээ илэрхийлж байсан юм.
Тэрбээр Нидерландад амьдардаг Францын иргэдтэй уулзах үеэрээ “Бид заримдаа ирээдүйнхээ төлөө маргаантай шийдвэр гаргадаг байх ёстой” гэж хэлсэн нь өөрийн санаачилсан тэтгэврийн шинэчлэлийг хамгаалсан хэрэг байв.
Эх сурвалж: AFP
