Украины дайнтай холбоотой зөрчлийн улмаас ОХУ-ын эрх баригчид дэлхийн тойрог зам дахь Олон Улсын Сансрын Станц (ОУСС)-ыг 2024 оноос хойш ашиглахаа болих шийдвэрийг өнгөрсөн оны долдугаар сард зарлаж байв.
Харин одоо уг шийдвэрээсээ татгалзаж, 2028 он хүртэл үргэлжлүүлэн ашиглахаар болсон байна.
Өчигдөр ОХУ-ын ерөнхийлөгч Владимир Путинтэй уулзахдаа Роскосмос агентлагийн захирал Юрий Борисов “ОУСС-ыг ашиглах хугацааг засгийн газар 2028 он хүртэл сунгахаар боллоо” гэж хэлснийг Оросын төв телевиз дамжуулжээ.
Тэр бас Орос улс өөрийн бие даасан станцтай болох шаардлага тулгарч буйг энэ үеэр онцолсон байна. “Бид ямар ч нөхцөлд сансрын нислэгээ завсарлаж болохгүй тул цаг хугацаа маш чухал болоод байна” гэж Борисов энэ үеэр хэлжээ.
Хүйтэн дайны дараа АНУ-ОХУ-ын харилцаа, хамтын ажиллагаа сайжирсны үр дүнд ОУСС-ыг 1998 онд байгуулж байв. Станцыг байгуулахад АНУ, ОХУ, Европ, Канад, Японы талууд хамтарсан юм.
Тухайн үедээ ОУСС-ыг 2024 он хүртэл ашиглах төлөвлөгөөтэй байжээ.
Гэхдээ АНУ-ын тал станцыг 2030 он хүртэл ашиглах боломжтой гэж үзэж байв.
Украины дайнаас үүдэлтэй зөрчил ч Орос, Америкийн сансрын хамтын ажиллагаанд саад болохгүй байгаа. Гэхдээ шинэ станц байгуулахад арав гаруй жилийн хугацаа шаардлагатай тул ОУСС-аас эрт гарах нь Оросын сансрын салбарт том ухралт болно гэж мэргэжилтнүүд үзэж байжээ.
Эх сурвалж: AFP
