Гадаад харилцааны сайд Б.Батцэцэг ХОМ-доо мэдүүлсэн өөрийн хувийн компаниудаа төсвийн тендерээр “угжуулдаг”-аараа хэзээнээс л алдартай. Ямар сайндаа л тэрээр Гадаад харилцааны сайдын албан тушаалд очсон цагаасаа эхлэн хэвлэлтэй холбоотой бүх тендерт ялалт байгуулсан нь нийтэд ил болж хэвлэлүүдийн сонорыг мялаах шиг л болдог. Түүнийг ямар ч тендерт ногоон гэрлээр ялалт байгуулдгийг баталсан хэд хэдэн жишээг энд хүргэе.
Гадаад харилцааны сайд Б.Батцэцэг нь Мөнхийн үсэг ХХК, Монголын үнэт цаас хэвлэл ХХК, Азхур ХХК гэх гурван компаниараа дамжуулан 2014 оноос 2020 оны хооронд 41 тендерт оролцож, нийт гурван тэрбум 260 гаруй сая төгрөг авсан баримт хэвлэлүүдээр ил болж байв. Түүний тендерын ялалтын буухиа энэ хүрээд дуусаагүй бөгөөд tender.gov.mn веб хуудсанд байршсан мэдээллээр дээрх хугацаанаас хойш Мөнхийн үсэг ХХК нь 14 тендерээс 1.4 тэрбум, харин Монголын үнэт цаас, хэвлэл ХХК-аараа дамжуулан 6 тендерт шалгарч 285 сая төгрөг, Азхур ХХК нь 12 тендерт ялалт байгуулж 1.1 тэрбум төгрөг авчээ. Дээрх тендерүүдийн ихэнх нь улсын их дээд сургуулиудын ромбо, дипломын хэвлэлийн гүйцэтгэл ажлын тендерийн сонгон шалгаруулалт байгаа юм.
Үүнээс харахад Б.Батцэцэг сайдын дээрх гурван компани нь улсын их дээд сургуулиуд болон улсаас зарласан тендерүүдэд ногоон гэрлээр хэрхэн шууд шалгардагийг харж болохоор юм.
Мөн 2020 оны Ерөнхийлөгчийн амлалт болох ахмадуудын тэтгэвэр барьцаалсан зээлийн төлбөрийг төрөөс нэг удаа төлөх тухай хуулийг УИХ-ын 2020 оны нэгдүгээр сард баталж, хоёрдугаар сард зургаан сая хүртэлх төгрөгийн тэтгэврийн зээлийг тэглэж байв. Улмаар зээлгүй ахмадуудыг хэрхэх асуудал яригдаж хэл ам болж байсан ба тэдгээр ахмадуудад нэг нэг сая төгрөгийн ваучер олгохоор болж байв.
Гэвч бүхэл зүйлс цахимжсан өнөө цаг үед ваучерийн мөнгийг ахмадуудын данс руу хийж болох байсан ч Б.Батцэцэг сайдын компанид давуу эрх олгож үргүй цаасны зардал гаргаж хэвлэж байлаа. За тэр ч дүүрч ахмадуудад цаасан дээр хэвлэх нь илүү хялбар байсан ч байж мэдэх юм. Гэвч тендерийн “ёондоотой” сайдын маань шилдэг санаа бусад хэвлэлийн компаниудаас хавь илүү үнэ өртөгтэйгөөр хэвлэгдсэн гэж байгаа. Тодруулбал бусад хэвлэлүүд 30-60 сая төгрөгийн өртөгтэйгээр үнийн санал өгсөн ч Б.Батцэцэг сайдын хувийн компани 592 сая төгрөгөөр хэвлэсэнд гол асуудал байгаа юм. Энэ нь түүнд ялтачгүй түүнд давуу эрх олгосон байгаа юм.
Мөн түүнчлэн өнгөрсөн оны сүүлийн саруудад манай улс иргэдийнхээ гадаад паспортыг өөрсдөө хэвлэдэг болно, зураг төсөл нь гарсан гэх шуум гарч байсан. Тодруулбал, ХЗДХ-ийн сайд Х.Нямбаатар нэгэн хэвлэлд энэ талаар ярьж байсан ба иргэн бүрийг цахим паспорттой болгоно хэмээж байлаа. Ямартай ч албан бус эх сурвалжийн мэдээлснээр “ГХЯ-ны чиглэлийн дагуу хувийн аж ахуй хэвлэдэг байсан гадаад паспортыг төр авч, өөрсдөө хэвлэдэг болно. Өөрөөр хэлбэл Гадаад хэргийн яам энэ ажлын хариуцаж авахаар болж байгаа юм болов уу. Нарийн учрыг нь сайн ойлгохгүй байна” гэв.
Хэрвээ энэ явдал үнэн бол хатагтай сайдын арга нарийсч улсын хэвлэл хэмээн хувийн байгууллагуудын ажлыг төр булааж авдаг тогтолцоо арилахгүй нь бололтой. Асуудал хэрхэхийг сайн мэдэхгүй ч улсын энэ том хэвлэлийн гүйцэтгэлийн ажиллагаан дээр хэн нэгэн сайдын албан тушаалаа ашиглах уу гэдэг нь цаг хугацааны хувьд тун удахгүй харуулах болно.
BOLOD.MN
