Пентагоны нууц бичиг баримтыг задруулсан хэрэгт холбоотой сэжигтнийг Холбооны Мөрдөх Товчооныхон өчигдөр баривчилжээ.
Сэжигтэн нь АНУ-ын агаарын хүчний үндэсний гвардын албан хаагч 21 настай Жэк Тейшера гэгч юм байна.
Түүний задруулсан бичиг баримтуудад Украины дайны тухай болон АНУ-ын холбоотнуудын тухай тагнуулын мэдээллүүд багтжээ.
Пентагон одоо алдагдсан мэдээллийн цар хүрээг тодорхойлох, эрсдэлийг үнэлэх ажиллагаа явуулж байгаа юм.
Алдагдсан баримтуудыг засварлан өөрчилж, худал мэдээлэл түгээж, олон нийтийг төөрөгдүүлэх суртал нэвтрүүлгийн ажиллагаанд ашигласан байж болзошгүй гэж сэжиглэж байна.
Нью-Йорк Таймс сонины мэдээлснээр баривчлагдсан Тейшера нь үндэсний гвардын тагнуулын албанд 2019 оноос хойш ажиллаж байжээ.
Түүний ажил үүрэг АНУ-ын агаарын зэвсэгт хүчний харилцаа холбооны дэд бүтцийн найдвартай ажиллагааг хангах юм байна.
Тейшера бас Discord платформд компьютер тоглоомчдын жижиг чат группийн тэргүүн байжээ. Алдагдсан бичиг баримтууд анх уг группийн гишүүдийн дунд тарж байсан байна.
Цар тахлын үеэр 2020 онд байгуулагдсан уг хаалттай групп 20 гаруй гишүүнтэй гэнэ.
Пентагоны алдагдсан нууц бичиг баримтуудын тухай АНУ-ын хэвлэлүүд долоо хоногийн өмнөөс мэдээлж эхэлсэн юм.
Уг бичиг баримтад Украины армийн эмзэг сул тал, АНУ-ын холбоотнуудын бодлого, үйл ажиллагааны талаар хаалттай мэдээллүүд багтсан нь нөхцөл байдлыг ноцтой болгож байв.
Тухайлбал Египет улс Вашингтонд мэдэгдэлгүйгээр ОХУ-д зэвсэг нийлүүлэх гэж байгаа тухай тагнуулын мэдээлэл эндээс задарч байжээ.
Мөн Оросын тагнуулын алба Арабын Нэгдсэн Эмиратын эрх баригчидтай харилцаагаа өргөжүүлж буй тухай, Өмнөд Солонгосын засгийн газар Украинд их бууны сум нийлүүлэх дургүй байгаа тухай зэрэг АНУ-ын холбоотнуудын нууцууд ил болсон юм.
Дээрх улсуудын эрх баригчид задарсан мэдээллүүдийг няцааж байгаа.
АНУ-ын батлан хамгаалах яамны хэвлэлийн төлөөлөгч Пэт Райдер “Нууцын зэрэглэлтэй мэдээлэл онлайн болон өөр хэлбэрээр ил болсон нь түүнийг нууцын зэрэглэлээс гаргасан гэсэн үг биш гэдгийг би онцлон хэлье. Үндэсний аюулгүй байдал, түүнчлэн манай холбоотнууд, түншүүдийн аюулгүй байдалд нөлөөлж болзошгүй тул бид нууц мэдээллийн талаар ямар нэг тайлбар хийж, үнэн худлыг нь нотлохгүй” гэж саяхан мэдэгджээ.
Эх сурвалж: Aljazeera
