АНУ-ын холбоотон Өмнөд Солонгос улс өнөөдрийг хүртэл Украинд зөвхөн хүмүүнлэгийн тусламж үзүүлж, зэр зэвсэг нийлүүлэхээс зайлсхийсээр ирсэн билээ.
Харин Лхагва гарагт тус улсын ерөнхийлөгч Юн Сүк Ёл “хэрвээ Украинд энгийн иргэдийн эсрэг томоохон халдлага гарах зэрэг олон улсын хамтын нийгэмлэгийн тэвчих аргагүй нөхцөл байдал үүсвэл тусламжаа зөвхөн хүмүүнлэгийн хүрээнд хязгаарлахгүй“ гэж Ройтерс агентлагийн сэтгүүлчтэй ярилцах үеэрээ хэлжээ.
Түүний хэлсэн энэ үг Кремлийн эрх баригчдыг нэлээд хилэгнүүлж, хариу мэдэгдэл хийхэд хүргэсэн юм.
“Сөүл найрсаг бус байр суурь илэрхийлсэн нь харамсалтай. Зэвсэг нийлүүлж эхэлбэл тус улсыг энэхүү мөргөлдөөний нэг оролцогч болсон гэж үзнэ” гэж Кремлийн хэвлэлийн төлөөлөгч Дмитрий Песков анхааруулжээ.
ОХУ-ын ерөнхийлөгч асан Дмитрий Медведевийн мэдэгдэл үүнээс ч хатуу байлаа.
Тэрбээр Сөүлийн эрх баригчид Украинд зэвсэг нийлүүлбэл хариуд нь Өмнөд Солонгосын эсрэг Умард Солонгосыг зэвсэглэхээр сүрдүүлсэн байна.
“Оросын хамгийн орчин үеийн зэвсгийг хамгийн ойр хөрш нь буюу манай холбоотон БНАСАУ хүлээж авбал энэ улсын иргэд юу гэж хэлэх бол” гэж Медведев хэлжээ.
Эх сурвалж: AFP
