Оросын хувийн зэвсэгт хүчний Вагнер группийн тэргүүн Украины сөрөг довтолгоо дараа долоо хоногт эхлэх төлөвтэй байгааг өчигдөр мэдээлжээ.

Евгений Пригожин өчигдөр Телеграм сувагтаа нийтэлсэн аудио мэдэгдэлд Украины сөрөг довтолгоо тавдугаар сарын 2-ноос хойш эхлэх нь тодорхой болсон, Украины сайтар бэлтгэгдсэн анги нэгтгэлүүд Бахмут хот руу гарсан тухай дуулгасан байна.

Тэрбээр бас Украины армийн сөрөг довтолгоог ямар ч үнээр хамаагүй няцаахын төлөө бүх хүчээ дайчлан тулалдахаа амлажээ.

Гэхдээ Пригожин энэ үеэрээ ОХУ-ын батлан хамгаалах яамны дэмжлэгт сэтгэл дундуур байгаагаа дахин илэрхийлсэн юм.

Тэрбээр Оросын албан ёсны арми яагаад Бахмутын ойролцоох Словянск, Краматорск зэрэг хотуудыг эзлэх ажиллагааг эхлүүлэхгүй байгаад гайхаж байгаагаа энэ үеэр хэлжээ.

Хэрвээ ингэвэл Бахмутын төлөө тулалдаж байгаа Вагнерын хүчинд чухал дэмжлэг болохыг Пригожин тайлбарласан байна.

Оросын эрх баригчид Бахмут хотыг эзлэх нь дорнод Украинд явуулж буй байлдааны ерөнхий ажиллагаанд чухал үүрэгтэй гэж үзэж байгаа.

Харин Украины тал болон Өрнөдийнхөн уг хотыг стратегийн ач холбогдол багатай тул алдахад гарзгүй гэж хэлдэг. Ямартай ч Бахмутын төлөө тулалдаан олон сар үргэлжилж, талуудын аль аль нь асар их хохирол амсаж буй гэсэн мэдээлэл бий.

Эх сурвалж: Aljazeera