Оросын хувийн зэвсэгт хүчний Вагнер группийн тэргүүн Америкийн сэтгүүлчдэд Бахмут хотыг тод харуулахын тулд их бууны галаа түр зогсоох гэж байгааг өчигдөр мэдэгджээ.

Гэхдээ дараа нь тэр хэлсэн үгнээсээ буцаж, хошигнол байсныг тайлбарласан байна.

Өнгөрсөн оны зунаас хойш Бахмут хот нь Украины дайны хамгийн халуун цэг болж, Оросын байлдааны ажиллагааг Вагнер группийн хөлсний цэргүүд тэргүүлж байгаа.

Украины зэвсэгт хүчин хотыг Оросын талд бүрэн алдалгүй зууралдан тулалдсаар байна.

Вагнерын тэргүүн Евгений Пригожин эхлээд сошиал хуудсандаа “Америкийн сэтгүүлчдэд Бахмутын зургийг аюулгүй аваад буцах боломж олгохын тулд их бууны галаа түр зогсоох шийдвэр гаргалаа” гэж мэдэгджээ.

Харин сүүлд тэр дахин мэдэгдэл гаргахдаа “Залуусаа, энэ бол цэргийн хошигнол шүү. Зүгээр л наргиа” гэж анхааруулсан байна.

Пүрэв гарагт Оросын талаас Украины хотуудад агаарын цохилт өгсний улмаас зургаан хүн алагдаж, 20 гаруй хүн шархаджээ.

Өмнөд Украины Миколайв хот руу дөрвөн ширхэг Калибр пуужин харвасны уршгаар нэг хүн алагдаж, 23 хүн шархадсан байна.

Энэ нь сүүлийн дөрвөн сарын хугацааны хамгийн хүчтэй агаарын цохилт байсныг хотын захирагч мэдээлжээ.

Мөн Запорожье, Донецк мужийн бусад хотуудад өгсөн агаарын цохилтын улмаас таван хүн алагдаж, дөрвөн хүн шархадсан байна.

“Дайны гол зорилго нь Украиныг сүйрүүлэх терроризм болохыг эзлэн түрэмгийлэгч улс батлан харуулахаа зогсоохгүй байна” гэж Украины ерөнхийлөгч Володимир Зеленский өчигдөр мэдэгджээ.

Өчигдөр Хар тэнгис дэх байлдааны хөлгөөс харвасан пуужингууд Миколайв хотын хувийн орон сууцнууд, түүхэн барилга байгууламжуудыг оносон юм байна. Цохилтод өртсөн газруудад ямар нэг цэргийн зориулалттай байгууламж байгаагүйг хотын захирагч Олександр Сенкевич мэдээлжээ.

Эх сурвалж: Associated Press