Лхагва гарагт Кремлийн ордон руу нисгэгчгүй онгоцоор халдсан хэргийг АНУ-ын заавраар Украины тал гүйцэтгэсэн гэх Оросын эрх баригчдын мэдэгдлийг Цагаан ордон няцаажээ.
Өчигдөр Кремлийн хэвлэлийн төлөөлөгч Дмитрий Песков сэтгүүлчидтэй уулзахдаа ингэж мэдэгдсэн юм.
Гэхдээ тэр ямар нэг баримт нотолгоо үзүүлээгүй байна.
“Ийм үйлдэл, ийм террорист халдлагын тухай шийдвэрийг Киевт биш, Вашингтонд гаргадгийг бид сайн мэдэж байна. Тэгээд Киев тушаалыг биелүүлсэн хэрэг. Үүнийг бид мэдэж байгааг, мөргөлдөөнд шууд хутгалдан оролцох ямар аюултайг Вашингтон ойлгох нь маш чухал” гэж Песков хэлжээ.
Үүний дараа Цагаан ордны үндэсний аюулгүй байдлын зөвлөлийн хэвлэлийн төлөөлөгч Жон Кирби “Ноён Песковын худал ярианаас үл хамааран АНУ энэ хэрэг явдалд ямар ч оролцоогүйг би тодорхой хэлж чадна. Бид юу болсон талаар ямар нэг дүгнэлтэд хүрээгүй байна. Юу болсныг олж мэдэхийн тулд чадах бүхнээ хийж байгаа” гэж сэтгүүлчдэд мэдээлсэн юм.
Лхагва гарагт болсон халдлагын дараа Оросын засгийн газрын хэд хэдэн өндөр албан тушаалтан хатуу хариу арга хэмжээ авахыг Кремльд уриалаад байгаа.
Тухайлбал ОХУ-ын ерөнхийлөгч асан Дмитрий Медведев халдлагын хариуд Украины ерөнхийлөгч Володимир Зеленскийг устгахаас өөр сонголт үлдээгүйг мэдэгдсэн байна. Оросын төрийн Думын дарга Вячеслав Володин орчин үеийн шинэ зэр зэвсгээ ашиглан Киевийн террорист дэглэмийг устгахыг уриалж байв.
Гэхдээ Кремлийн эрх баригчид тийм эрс шийдэмгий хариу арга хэмжээ авах шинжгүй байна.
Өчигдөр Песков хэлэхдээ халдлагын талаар ОХУ-ын ерөнхийлөгч Владимир Путин онцгойлон ямар нэг байр суурь илэрхийлэх төлөвлөгөөгүй байгааг хэлжээ. Бас Путин ердийн үеийнх шиг Кремлийн ордонд ажил хэргээ явуулахыг мэдэгдсэн юм.
Лхагва гарагийн орой Оросын төв телевизийн суваг дроны халдлагын дүрс бичлэгийг үзүүлээгүй бөгөөд халдлагын талаар Кремлийн албан ёсны мэдэгдлийг л уншсан байна.
Украинд байлдаж байгаа Вагнер группийн тэргүүн Евгений Пригожин өчигдөр гаргасан мэдэгдэлдээ “Хэдийгээр би өөрөө радикал хүмүүсийн нэг боловч дроны халдлагын хариуд цөмийн зэвсэг хэрэглэх нь байж боломгүй зүйл гэж бодож байна” гэж ярьжээ.
Кремлийн суртал нэвтрүүлэгчдийн нэг, Russia Today телевизийн сувгийн захирал Маргарита Симоньян хэрвээ дроны халдлагыг Оросын тал өөрөө зохион байгуулсан бол нөхцөл байдал өнөөдрийнх шиг ийм нам гүм байхгүй гэж үзэж байгаагаа илэрхийлсэн байна.
“Хэрвээ Кремль өөрийн цаашдын үйлдлийг зөвтгөх зорилгоор хуурамч халдлага зохион байгуулсан бол өнөөдөр нөхцөл байдал тэс өөр байх байсан. Хатуу хариу арга хэмжээ авахыг уриалсан мэдэгдлүүд ар араасаа цуварч, энэ талаар шуурхай хуралдааныг ард түмэнд шууд дамжуулан үзүүлэх байлаа” гэж тэр сошиал хуудсандаа бичжээ.
Эх сурвалж: The Guardian