Өмнөд Африкийн Бүгд Найрамдах Улсын зарим иргэд маргааш хаан ширээнд залрах гэж буй Чарльзын титмийг чимэглэсэн дэлхийн хамгийн том алмааз эрдэнийн чулууг буцааж авахаар Их Британийн засгийн газарт хандаж эхэлжээ.
530 каратын жинтэй уг эрдэнийн чулууг 1905 онд Өмнөд Африкаас олборлож байсан юм. Хоёр жилийн дараа тухайн үеийн колонийн захиргаа үүнийг Их Британийн хаанд бэлэглэж байжээ.
Сүүлийн жилүүдэд Африкийн улс орнуудын дунд колоничлолын үед алдагдсан үнэт эд зүйлсээ Европын орнуудаас буцааж авах хөдөлгөөн идэвхжээд байгаа.
“Алмааз эрдэнэ Өмнөд Африкт буцаж ирэх ёстой. Энэ бол манай бахархал, манай өв уламжлал, соёлын нэг хэсэг юм” гэж уг хөдөлгөөнийг санаачилсан хуульч Мотуси Каманга ярьж байна.
Түүний санаачилсан онлайн хөдөлгөөнд 8,000 гаруй хүн нэгджээ.
“Африкийн ард түмэнд эрх чөлөө өгсөн нь колоничлолоос бүрэн ангижирсан гэсэн үг биш. Биднээс булаан авсан зүйлсийг буцааж авах нь энэ үйл явцын нэг хэсэг гэж би үзэж байна” гэж тэр тайлбарлажээ.
Албан ёсоор “Cullinan I” гэж нэрлэдэг алмааз эрдэнийг Преторийн ойролцоо уурхайгаас олборлосон 3,100 каратын чулуунаас тасалж авсан байдаг. Энэ чулуунаас тасалсан арай жижиг хэмжээтэй хэсгийг “Cullinan II” гэж нэрлэдэг бөгөөд одоо Британийн хааны титмийг чимэглэж байдаг юм.
Лондон цамхагт хадгалагддаг титмийг Британийн хаад ёслол хүндэтгэлийн арга хэмжээнд зүүдэг байна.
Хуваагдаагүй бүхэл Cullinan алмааз эрдэнийн чулуу нь хүний зангидсан нударгын хэмжээтэй байжээ.
Үүнийг дуурайлгасан загвар нь одоо ӨАБНУ-ын Кэйп-Таун хотын Алмааз Эрдэнийн Музейд байдаг.
Эх сурвалж: Aljazeera