Энэ сарын 8-11-ний өдрүүдэд Арабын Нэгдсэн Эмират Улсын Абу Даби хотноо зохион байгуулагдсан Олон улсын хөрөнгө оруулалтын чуулга уулзалтын үеэр гарсан үзэсгэлэнд Монгол Улсын урлагийн гавьяат зүтгэлтэн, зураач Н.Сэргэлэнгийн бүтээл “Дэлхийн нэг өдөр” уран зургийг олон нийтэд толилуулжээ.
“Дэлхийн нэг өдөр” бүтээлийн өндөр нь 2.5 метр, урт нь 21 метр бөгөөд гуашаар зурсан дэлхийн хамгийн том уран зураг юм.
Абу Даби хотын орчин цагийн урлаг, соёлын бүтээлүүдийг өргөн олон түмэнд танилцуулдаг “Manarat Al Saadiyat” галерейд тавдугаар сарын 12-20-ны өдрүүдэд уг бүтээлийг дэлгэн үзүүлж байна.
“Дэлхийн нэг өдөр” уран зургийг Абу Даби-гийн Угсаа залгамжлах ханхүү Эрхэм дээд Шейх Халед бин Мухаммад бин Заид Аль-Нахъян, тус улсын Хууль зүйн сайд Абдулла Аль-Нуами, Засгийн Газрын гишүүн, Гадаад Худалдааны асуудал эрхэлсэн Төрийн сайд Тани бин Ахмад Аль-Зивуиди, Абу Дабигийн эдийн засгийн департаментын Төрийн нарийн бичгийн даргын орлогч Рашид Абдулкарим Аль-Блуши, мөн Эмиратын болон гадаадын өндөр албаны хүмүүс үзлээ хэмээн ГХЯ мэдээлэв.