Баасан гарагт бараг дөрвөн жилийн дараа Москва-Тбилисийн шууд нислэг сэргэж, Оросын зорчигч тээврийн онгоц анхны нислэгийг үйлдсэн нь Гүржийн иргэдийн эсэргүүцэлтэй тулгарсан юм.
2019 онд Тбилисид болсон Оросын эсрэг жагсаалын дараа ерөнхийлөгч Владимир Путин хоёр улсын хоорондын шууд нислэгийг зогсоох шийдвэр гаргаж байжээ.
Эхний нислэгээр ОХУ-ын гадаад хэргийн сайд Сергей Лавровын охин Екатерина Винокурова нөхрийнхөө дүүгийн хуримын ёслолд оролцохоор хамаатнуудынхаа хамт Гүржид ирсэн тухай тус улсын хэвлэлүүд мэдээлсэн байна.
Бямба гарагт Гүржийн сөрөг хүчний нам Винокуровагийн буусан гэгдэж буй Кварели Нуур амралтын газрын гадна эсэргүүцлийн цуглаан зохион байгуулжээ.
Энэ үеэр жагсагчид Оросын жуулчдыг тээвэрлэж явсан автобус руу өндөг шидэж, цагдаа нартай тулгарсан байна. Мөргөлдөөнд оролцсон 16 хүнийг цагдаа нар баривчилснаа сүүлд сулласан тухай хэвлэлүүд мэдээлсэн юм.
16 activists arrested in #Kvareli and #Sagarejo for protesting the wedding of Sergei #Lavrov's relatives in #Georgia have been released. Their cases will be discussed in court on June 19. It's common for arrested on similar charges to be fined 2K GEL.https://t.co/vYDSDqoA0W
— Netgazeti (@netgazeti) May 21, 2023
Сүүлд Гүржийн ерөнхийлөгч Саломе Зурабишвили хэвлэлийн хурал зохион байгуулахдаа Лавровын төрөл төрөгсөд Гүржийн нутгаас явсан тухай мэдээллийг дотоод хэргийн сайдаасаа авсныг дуулгажээ.
Гэхдээ тэднийг Гүржид хэзээ ирсэн, хэзээ явсан талаар нарийн мэдээлэл өгөөгүй байна.
Лавровын охин Их Британи, АНУ, Канад улсуудын засгийн газрын хар жагсаалтад багтсан байдаг юм. Түүний нөхөр буюу Лавровын бизнесмэн хүргэн Винокуров бас Европын Холбооны эдийн засгийн хоригоор шийтгүүлж байжээ.
Путиний ойрын хүрээний өндөр албан тушаалтны хоригт багтсан охин Гүржид ирснийг засгийн газар нь мэдээгүй байсан гэдэгт эргэлзэж байгаагаа ерөнхийлөгч Зурабишвили мэдэгдсэн юм.
Тэрбээр хоригоор шийтгүүлсэн Оросын хувь хүмүүсийг нутаг дэвсгэртээ нэвтрүүлэхгүй байж, улс орноо эрсдэлээс хамгаалахыг засгийн газартаа уриалжээ.
Улс орноо Европын Холбоонд нэгтгэх хүсэлтэй ерөнхийлөгч Зурабишвили засгийн газартайгаа нэлээд зөрчилтэй байдаг.
Тус улсын эрх баригч Гүржийн Мөрөөдөл намыг Москвагийн эрх баригчидтай хэлхээ холбоотой гэх шүүмж байнга яригддаг юм. Энэ оны гуравдугаар сард тус намын засгийн газар ОХУ-д хэрэгждэгтэй ижил төстэй гадаад агентын тухай хуулийг парламентаар батлуулах гэсэн нь Гүржийн иргэдийн ширүүн эсэргүүцэлтэй тулгарч байв.
Тбилисид болсон томоохон жагсаалын дараа засгийн газар хуулийн төслөө буцаан татаж байжээ.
Эх сурвалж: CNN
