Зургаадугаар сарын 1-нээс эхлэн Хятад улс ОХУ-ын Владивосток боомтыг өөрийн дотоод боомтоор ашиглахаар болжээ.
Өөрөөр хэлбэл Хятадын зүүн хойд нутаг болон өмнөд нутгийн хооронд далайгаар бараа тээвэрлэхдээ гаалийн татваргүйгээр Владивостокын боомтыг ашиглах юм байна.
Владивосток нь 1860 оныг хүртэл Манж Чин улсын нэг хэсэг байсан юм.
Тиймээс Украины дайны улмаас хүч нь суларсан Оросоос 163 жилийн дараа Хятад улс алдагдсан газар нутгаа авч байна гэж зарим ажиглагчид дүгнэж байна.
Одоо Хятадын өмнөд нутгаас зүүн хойд нутагт ачаа тээвэрлэхдээ Далянь боомтыг ашигладаг ба эндээс зүүн хойд бүсийн хотуудад хуурай газраар хүргэхэд 1,000 гаруй километр зам туулдаг ажээ.
Харин Владивостокыг дотоод боомтоор ашиглавал энэ зай 200 км орчим болж хэмнэгдэх юм.
Москвагийн эрх баригчид Владивосток боомтыг Хятадад ашиглуулахаар болсон нь Украины дайны үед эдийн засгийн түшиг тулгуур болж буйнх нь “төлөөс” гэж зарим судлаачид үзэж байна.
Энэ оны хоёрдугаар сард Хятадын эрдэс баялгийн яам Орос-Хятадын хил дагуух найман газрын хятад нэрийг газрын зурагт сэргээн хэрэглэх журам гаргаж байжээ.
Үүний дагуу Владивосток хотыг “Хайшэнвай” гэж нэрлэх юм байна.
Эх сурвалж: TVP World