ОХУ-ын батлан хамгаалахын сайд Сергей Шойгу энэ долоо хоногийн эхээр хийсэн мэдэгдэлдээ Украины сөрөг давшилтыг няцааж чадсан амжилтаа зарлаж байв.
Энэ үеэр тэр Өрнөдийн орнуудаас Украины армид тусламжаар илгээсэн Германы Leopard 2 танкийг устгаснаа батлах зураг бичлэг үзүүлсэн юм.
Гэтэл энэ нь үнэндээ тракторын дүрс байсныг судлаачид тогтоосон байна. Тухайлбал Мягмар гарагт Оросын батлан хамгаалах чиглэлээр бичдэг Военный Осведомитель блогт сайдын үзүүлсэн дүрс Leopard 2 танк биш, трактор байсныг харьцуулан үзүүлжээ.
Russians have released a video in which they claim a Russian Ka-52 helicopter strikes on “Leopard 2 tanks.” Only for some reason this “Leopard” looks more like a tractor. For example, John Deere 4830. pic.twitter.com/0e1l2GEp2C
— Special Kherson Cat 🐈🇺🇦 (@bayraktar_1love) June 6, 2023
Шойгу мэдэгдэлдээ Украины найман ширхэг Leopard 2 танкийг устгаснаа зарласан юм. Тэрбээр Орос, Украины хохирлын талаар урьд өмнө өгч байгаагүй дэлгэрэнгүй мэдээллийг энэ үеэр танилцуулсан нь ховор үзэгдэл байв.
Тухайлбал энэ тулаанд Украины талаас 3,175 цэрэг алагдсан бол оросын талаас ердөө 71 цэргийн алба хаагч амь үрэгдэж, 210 шархадсан тухай Шойгу мэдээлсэн юм.
Тэр бас дайсныхаа 52 танк, 207 хуягт тэргийг устгаснаа зарлаж байв. Харин Оросын хохирлын хэмжээг 15 танк, есөн хуягт тэрэг гэж мэдээлсэн юм.
Оросын бусад судлаачид ч бас батлан хамгаалахын сайдынхаа худал мэдээллийг шүүмжлэн бичицгээсэн байна. Тухайлбал Оросын үндсэрхэг үзлийг сурталддаг Fighterbomber блог тракторуудын зураг нь Украинд Leopard 2 танкууд ирээгүй байхад буюу өнгөрсөн онд авсан гэрэл зураг болохыг баталжээ.
Ер нь ОХУ-ын батлан хамгаалах яам Украины дайнд гаргасан амжилтаа хэтрүүлэн мэдээлдэг. Тус яамны хэвлэлийн төлөөлөгч Игорь Конашенковын мэдээлснээр Оросын арми Украины агаарын хүчний нийт онгоцны тооноос давсан тооны нисэх онгоцыг устгаад байгаа юм.
Эх сурвалж: Reuters