Украины арми зүүн өмнөд фронтын 100 км орчим үргэлжилсэн хэсэгт амжилттай давшсан тухайгаа Даваа гарагт мэдээлжээ.
Өмнөх өдөр нь Запорожье мужийн Мокрые Ялы голын дагуу оршдог Благодатне, Нескучне, Макаровка тосгодыг Оросын цэргийн хяналтаас чөлөөлснөө Киевийн эрх баригчид мэдээлж байв.
Харин өчигдөр нэмж Левадне, Новодаровка, Лобкове тосгодыг чөлөөлснөө Украины батлан хамгаалахын дэд сайд Ханна Маляр мэдээлжээ.
Украины цэргүүд энэ чиглэлд нийтдээ 6.5 км давшсан тухай тэр мэдээлсэн байна. Сүүлийн нэг долоо хоногийн хугацаанд нийтдээ 90 км.кв талбайтай нутаг дэвсгэр, долоон суурин газрыг чөлөөлснөө Маляр нэмж хэлжээ.
Одоо Украины зэвсэгт хүчин Азовын тэнгисийн эргээс 90 км зайд хүрээд байгаа гэнэ.
Хэрвээ тэнгисийн эрэгт хүрвэл 2014 онд Орост хүчээр нэгтгэгдсэн Крымийн хойгийг Украины бусад эзлэгдсэн нутаг дэвсгэрээс таслах юм.
Украины арми фронтын бусад хэсэгт мөн байлдааны ажиллагаа явуулж, Оросын хориглолтын эмзэг хэсгүүдийг туршин шалгаж байгаа гэсэн мэдээлэл бий.
Гэхдээ Өрнөдийн цэргийн мэргэжилтнүүд Украины сөрөг давшилтын эхний үе шатанд гаргасан амжилтыг хэт үнэлж болохгүйг анхааруулж байна. Учир нь эзлэгдсэн нутаг дэвсгэрийн гүн рүү давших тусам эсэргүүцэл улам ширүүсэх магадлалтай гэнэ.
Оросын тал олон сарын турш хориглолтод бэлдсэн, хүн хүч, агаарын цохилтын зэвсгийн нөөцөөр давуу байгааг тэд анхааруулж байна.
Одоогоор Оросын эрх баригчид Украины армийн амжилтыг огт хүлээн зөвшөөрөөгүй байгаа. Даваа гарагт ОХУ-ын батлан хамгаалах яам зэвсэгт хүчин нь Донецк, Запорожье мужуудад явуулж буй Украины сөрөг давшилтыг няцааж, алсын тусгалын пуужингаар нөөц байрлалуудад нь цохилт өгсөөр байгааг мэдээлжээ.
Гэхдээ Оросын батлан хамгаалах чиглэлээр бичдэг алдартай блогчид Благодатне, Нескучне, Макаровка тосгодыг Украины арми хяналтдаа авсныг хүлээн зөвшөөрсөн байна.
АНУ-ын төрийн нарийн бичгийн дарга Энтони Блинкен өчигдөр Вашингтон хотод сэтгүүлчидтэй уулзахдаа Украины сөрөг давшилтын явцын талаар ярихад хэтэрхий эрт байгаа ч амжилт гаргана гэдэгт итгэлтэй байгаагаа илэрхийлжээ.
Тэрбээр АНУ-ын засаг захиргаа Украин улсад үзүүлэх тусламж дэмжлэгээ нэмэгдүүлэх эрмэлзэл дүүрэн байгаа бөгөөд удахгүй Вильнюс хотод зохион байгуулагдах НАТО-гийн дээд хэмжээний уулзалтаар улс төр, зэр зэвсгийн томоохон тусламжийн багцыг шийдвэрлэх хүлээлттэй байгааг мэдэгдсэн байна.
Өчигдөр ОХУ-ын ерөнхийлөгч Владимир Путин “Оросын өдөр“-ийг тохиолдуулан Кремлийн ордонд төрийн одон медаль гардуулах ёслолд оролцжээ.
Энэ үеэрээ тэр Украины дайны талаар цухас дурдсан юм. “Өнөөдөр Оросын хувьд хүнд хэцүү цаг үе тохиож байгаа ч эх оронч үзэл, бахархал манай нийгмийг улам хүчтэй нэгтгэж байна. Энэ нь цэргийн тусгай ажиллагаанд оролцож буй манай баатруудад найдвартай ар тал, дэмжлэг болж байна” гэж тэр хэлжээ.
Эх сурвалж: Reuters
