Украины армийн сөрөг давшилтын эхний өдрүүдэд гаргасан амжилтын тухай мэдээг ОХУ-ын ерөнхийлөгч Владимир Путин үгүйсгэжээ.
Тэрбээр өчигдөр Оросын батлан хамгаалах чиглэлээр бичдэг нийтлэлчидтэй уулзахдаа Украины болон өөрийн армийн хохирлын талаар зарим тоо баримтыг дэлгэсэн байна.
Путиний хэлснээр сүүлийн долоо хоног орчим хугацаанд Украины арми Өрнөдийн илгээсэн байлдааны машин механизмынхаа 25-30 хувийг алдсан гэнэ. Үүнээс 160 нь танк байгааг тэр баталжээ.
“Энэ бол стратегийн нөөцөө ашигласан томоохон сөрөг давшилт юм. Тэд 160 гаруй танкаа алдсан бол бид 54 танк алдсан. Гэхдээ эдгээрийн зарим нь засаж сэлбэх боломжтой” гэж Путин ярьсан байна.
Тэрбээр мөн сөрөг давшилтын эхний өдөр (Путиний хэлснээр зургаадугаар сарын 4) Украины армийн хүн хүчний хохирол Оросынхоос 10 дахин өндөр байсныг мэдэгджээ.
“Тэдний хохирлын хэмжээг сүйрэл гэж хэлж болохоор байна” гэж Путин хэлсэн байна.
Путин цааш нь ярихдаа Нова Каховкагийн даланг Украины тал АНУ-ын HIMARS пуужингийн системээр устгасныг хэлжээ.
“Украины тал өөрсдөө үүнийг хийсэн. Харамсалтай нь ингэснээрээ тэд Херсон чиглэлийн сөрөг давшилтдаа саад учруулсан” гэж тэр хэлсэн юм.
Путиний ярьсан зүйлс бүгд Украины талын мэдээлж байгаагаас эсрэг байлаа.
Даваа гарагт Киевийн эрх баригчид өгсөн мэдээлэлдээ сөрөг давшилтын үр дүнд Запорожье мужийн долоон суурин, нийт 90 км.кв талбай бүхий нутаг дэвсгэрийг чөлөөлснөө зарлаж байв.
Мөн Нова Каховкагийн даланг Оросын тал дэлбэлсэн гэж тайлбарлаж байгаа. Киевийн эрх баригчдын энэ тайлбарыг батлах баримт одоогоор ил болоогүй байна.
НАТО-гийн ерөнхий нарийн бичгийн дарга Йенс Столтенбэрг өчигдөр Цагаан ордонд АНУ-ын ерөнхийлөгч Жо Байдентай уулзахдаа Украины армийн сөрөг давшилт “ахицтай” байгааг дуулгасан юм.
“Бидний хамтдаа Украинд үзүүлсэн тусламж дэмжлэгийн үр дүнд байлдааны талбарт нөхцөл байдал өөрчлөгдөж байна. Сөрөг давшилт эхэлснээр Украины тал ахиц дэвшил гаргаж эхэлсэн. Хэдийгээр хугацааны хувьд эрт байгаа ч Украинчууд улам их газар нутаг чөлөөлж, хэлэлцээний ширээний ард суухад давуу байр суурьтай болох чадвартай нь бидэнд харагдаж байна” гэж тэр хэлжээ.
Фронтын шугам дээр ширүүн тулаан үргэлжлэхийн зэрэгцээ Оросын тал Украины хотуудад алсаас агаарын цохилт өгөхөө зогсоохгүй байна.
Мягмар гарагийн шөнө ерөнхийлөгч Зеленскийн төрсөн хот Кривой Рог агаарын довтолгоонд өртсөний улмаас таван давхар орон сууц сүйрч, 11 хүн алагдаж, олон тооны хүн шархаджээ.
Оросын талаас нийт 14 далавчит пуужин харвасны 10-ыг, дөрвөн дроноор довтолсны нэгийг устгаж чадсанаа Украины армийн албаны эх сурвалж мэдээлсэн байна.
Өчигдрийн уулзалтын үеэр Путин бас өөрийн армийн зэвсэг техникийн нөөцөд санаа зовж байгаагаа илэрхийлсэн юм.
“Цэргийн тусгай ажиллагааны үеэр бидэнд олон зүйл дутагдаж байна. Өндөр нарийвчлалтай сум, харилцаа холбооны хэрэгсэл, дрон гэх мэт. Эдгээр нь бидэнд байгаа ч хангалтгүй байна” гэж тэр хэлжээ.
Гэхдээ Путин цэргийн дайчилгаа нэмж зарлах хэрэгтэй эсэхэд эргэлзэж байгаагаа энэ үеэр илэрхийлсэн юм.
“Зарим олны танил хүмүүс бидэнд нэгээс хоёр сая нэмэлт хүч хэрэгтэй гэж ярьж байна. Гэхдээ энэ нь бид юу хүсэж байгаагаас шалтгаална. Бид Киевт буцаж очих гэж үү?” гэж тэр ярьсан нь өнгөрсөн оны гуравдугаар сард Оросын арми Украины нийслэлийн дэргэдээс ухарсныг хэлсэн хэрэг байв.
Эх сурвалж: The Guardian
