Зургаадугаар сарын 6-ны өдөр Оросын хяналтад байгаа Украины Херсон мужийн нутаг дахь Нова Каховкагийн усны далан сүйрч, томоохон хэмжээний газар нутаг үерт автсан билээ.

Дайтагч талууд даланг санаатай сүйтгэсэн хэмээн харилцан нэгнээ буруутгаж байгаа. Тухайлбал Украины арми HIMARS пуужингийн системээр даланг буудаж сүйтгэсэн гэж Оросын тал тайлбарлаж байна. Харин Украины тал Оросууд өөрсдөө дэлбэлсэн гэж үзэж байгаа.

Гэхдээ даланг Оросын тал өөрсдөө дэлбэлсэн байж болзошгүйг харуулсан баримт нотолгоо улам нэмэгдэж байна. Тухайлбал Румын дэх Норвегийн газар хөдлөлтийг бүртгэх станц тухайн өдөр далангийн орчим хүчтэй дэлбэрэлт болсныг мэдэрсэн нь тогтоогдсон юм. Өөрөөр хэлбэл даланг алсаас пуужингаар буудах биш, тэсрэх бодисоор дэлбэлсэн нь эндээс харагдсан байна.

Тэгвэл Ням гарагт New York Times сонин даланг Оросын тал санаатай дэлбэлсэн гэх дүгнэлтийг мэргэжилтнүүдийн судалгаанд үндэслэн мэдээлжээ.

“An Inside Job” (Дотроосоо хийсэн ажил) гэх гарчиг бүхий уг нийтлэлд дэлбэрэлт далангийн дотоод хэсэгт болсныг баталсан байна.

“Оросын тал өөрийн хяналтын хэсэгт тэсэлгээ зохион байгуулсныг нотлох баримт тодорхой харуулж байна” гэж уг нийтлэлд дүгнэжээ.

Зөвлөлтийн үед байгуулагдсан далангийн бүтцийн бүх зураг Москвагийн эрх баригчдын гарт байдаг тул тэд эмзэг цэг бүрийг нь маш сайн мэдэж байгаа гэнэ.

Хүйтэн дайны үед байгуулагдсан тул уг далан гаднын ямар ч халдлагыг тэсвэрлэх чадвартайгаар бүтээгдсэн гэж нэг мэргэжилтэн тайлбарлажээ. Тиймээс нүсэр бетон байгууламжийг гаднаас нь буудаж эвдэх боломж бага гэж үзэж байна.

Харин далангийн дотор талд байрлах инженерийн хяналтын хонгилд их хэмжээний тэсрэх бодис байрлуулан дэлбэлсэн байх магадлал өндөр гэж дүгнэжээ.

Украины дайны нөхцөл байдлын сүүлийн үеийн бусад мэдээллээс дурдвал:

• Украины арми Запорожье мужийн төмөр замын зангилаа Пятихатки тосгоныг эзэлсэн тухай Москвагаас томилогдсон орон нутгийн удирдлага Ням гарагт мэдээлжээ. Энэ нь Оросын тал ухралтаа хүлээн зөвшөөрсөн ховор тохиолдол юм. “Украины арми их хэмжээний хохирол амссан ч тосгоныг гартаа оруулж чадлаа” гэж Запорожье мужийн Москвагаас томилогдсон захирагч Владимир Рогов сошиал хуудсаараа мэдээлжээ.
• Украины тал эзлэгдсэн нутаг дэвсгэр дэх Оросын зэвсгийн томоохон агуулахыг устгаснаа Ням гарагт мэдээллээ. Ойролцоо нь уг агуулах байрладаг Херсон мужийн Хеническ нь Азовын тэнгисийн боомт хот юм. “Агуулахад маш их хэмжээний зэвсэг байсныг устгалаа” гэж Одессын цэргийн тойргийн хэвлэлийн төлөөлөгч Сергей Братчук мэдээлжээ. Украины хэвлэлүүд алсад хүчтэй дэлбэрэлтийн чимээ гарч, тэнгэрийн хаяанд их хэмжээний утаа олгойдож буйг харуулсан дүрс бичлэгийг үзүүлсэн байна.
• Украины арми зүүн фронтын шугамд бага хэмжээгээр давшсаныг Их Британийн батлан хамгаалах яам мэдээлсэн байна. Ням гарагт тус улсын тагнуулын албаны ээлжит тайлан нийтлэгдсэн юм. Уг тайланд өгүүлснээр сүүлийн өдрүүдэд зүүн фронт дээр Бахмутын ойролцоо болон өмнөд фронтын шугам дагуу маш ширүүн тулалдаан үргэлжилж байгаа гэнэ. Зүүн фронт дээр Украины арми бага хэмжээгээр урагшилсан бол өмнөд фронт дээр Оросын арми амжилттай эсэргүүцэн тулалдаж байгаа ажээ. Талуудын аль аль нь их хэмжээний хохирол амсаж байгааг мэдээлсэн байна. Оросын талын хохирол энэ оны гуравдугаар сард Бахмутын дэргэд амссан оргил хэмжээндээ хүрсэн гэж Британийн тусгай албад дүгнэжээ.

Эх сурвалж: Deutsche Welle