Оросын эрх баригчид АНУ-д урвасан тусгай албаны экс ажилтнаа устгах ажиллагааг 2020 онд зохион байгуулж байсан тухай түүхийг Нью Йорк Таймс сонин өчигдөр мэдээлжээ.
Энэхүү нууц ажиллагааны талаар баримтыг тус сонин АНУ-ын тагнуулын албанд ажиллаж байсан гурван эх сурвалжаас авсан юм байна.
Нийтлэлийн гол баатар Александр Потеев нь Оросын тусгай албанд ажиллаж байхдаа АНУ-ын Тагнуулын Төв Газрын мэдээлэгч болж байжээ. Түүний дамжуулсан нууц мэдээллийн тусламжтайгаар Холбооны Мөрдөх Товчоо 2010 онд АНУ-ын зүүн эрэг дагуу ажилладаг байсан Оросын 11 тагнуулчийг илрүүлж байсан гэнэ.
Мэдээлэгч болох нь илэрсний дараа Потеев эх орноосоо Беларусиар дамжин дүрвэж байжээ. Тэрбээр АНУ-д ирснийхээ дараа Тагнуулын Төв Газрын тагнуулчдыг хамгаалах тусгай хөтөлбөрт хамрагдаж, Флорида мужийн Майами хотод нууц нэрээр амьдрах болсон байна.
2011 онд Оросын шүүх Потеевт эх орноосоо урвасан хэрэг тулгаж, 25 жилийн хорих ял эчнээ оноож байжээ.
Харин сүүлд олон жилийн дараа Потеев загас барих зөвшөөрөл авахдаа жинхэнэ нэрээ ашигласны улмаас Оросын тусгай албад түүний хаана амьдарч байгааг мэдсэн юм байна.
Ингээд тэд Потеевыг устгах ажиллагааг хэрэгжүүлэхээр төлөвлөж, Мексикийн эрдэмтэн Эктор Алехандро Кабрера Фуэнтесийг ашиглахаар болжээ.
Хоёр охины эцэг Фуэнтес нь орос эхнэртэй хүн байсан бөгөөд Оросын тусгай албад гэр бүлийнхэнд нь хилийн хориг тавьж, барьцаалах замаар эрдэмтнийг ажиллагаандаа оролцуулахаар болсон байна.
Ингээд Потеевын гэрийн ойролцоо байр түрээсэлж, машиныг нь дагаж мөрдөх даалгаврыг Фуэнтес авсан гэнэ. Ингэхдээ гэрэл зураг авч болохгүйг түүнд хатуу анхааруулжээ.
Гэвч Потеевын амьдардаг хотхонд анх удаа нэвтрэхдээ Фуэнтес бусдын автомашиныг мөргөснөөс төлөвлөгөө бүтэлгүйтсэн байна.
Түүнийг харуултай ярилцаж зогсох үеэр эхнэр нь анхааруулгыг зөрчиж, ойролцоо зогсож байсан Потеевын автомашины дугаарын зургийг камераараа авчээ.
Хяналтын камерт бичигдсэн энэхүү сэжигтэй үйлдлийг Тагнуулын Төв Газар тэр дор нь анхааралдаа авч, хоёр өдрийн дараа АНУ-аас гарах гэж байсан Фуэнтесийг саатуулсан юм байна.
Нууц ажиллагаа илэрсний дараа 2021 онд АНУ-ын засаг захиргаа ОХУ-ын эсрэг хориг арга хэмжээ авч, 10 дипломатчийг нь нутаг дэвсгэрээсээ хөөж байжээ. Хариуд нь Москвагийн эрх баригчид ижил арга хэмжээ авч, АНУ-ын 10 дипломатчийг хөөсөн байна.
Дээрх үйл явдлаас хоёр жилийн өмнө Английн Солсбэри хотод амьдардаг Оросын цэргийн тагнуулын газрын офицер асан Сергей Скрипачийг охиных нь хамт хордуулсан хэрэг гарч байсан юм. Тэрбээр Их Британийн тусгай албадад мэдээлэгчээр ажиллаж байгаад Оросоос дүрвэсэн хүн байжээ.
Эх сурвалж: Aljazeera
