Беларусийн ерөнхийлөгч Александр Лукашенко өчигдөр Санкт-Петербург хотод ОХУ-ын ерөнхийлөгч Владимир Путинтэй уулзжээ.
Беларусийн армийг сургаж буй Вагнер хувийн зэвсэгт хүчний цэргүүд НАТО-гийн гишүүн Польш улсын нутаг дэвсгэрт халдах хүсэлтэй байгаа тухай Лукашенко энэ үеэр Путинд хошигносон өнгө аясаар ярьсан байна.
“Вагнерын залуус бидэнд төвөг учруулж эхэллээ. Тэд баруун зүгт явах хүсэлтэй гэнэ. Варшав, Ржешов руу явуулцгаая” гэж тэр ярьжээ.
Оросын эрх баригчдын эсрэг нэг хоногийн зэвсэгт бослого гаргасныхаа дараа Вагнерын хөлсний цэргүүд Беларусийн нутаг дэвсгэрт шилжин байрлахаар болсон юм.
Үүний хариуд Польш улс Беларусийн хилийн ойролцоох нутаг дэвсгэртээ зэвсэгт хүчний анги нэгтгэлүүдийг нэмж байрлуулсан билээ.
Өнгөрсөн долоо хоногт Путин төв телевизээрээ Польш улс Беларусь, Украины газар нутгийг эзлэн түрэмгийлж болзошгүй тухай ярьж байв.
Ингэсэн тохиолдолд ойрын холбоотон Беларусь улсыг бүх арга хэрэгслээ ашиглан хамгаалахаа тэр бас илэрхийлсэн юм.
Өчигдрийн уулзалтын үеэр бас Путин, Лукашенко нарын хооронд Украины сөрөг давшилтын талаар яриа өрнөсөн байна.
“Ямар ч сөрөг давшилт болоогүй” гэж Лукашенког хэлэхэд Путин “Давшилт болсон. Гэхдээ бүтэлгүйтсэн” гэж хариу хэлсэн байна.
Украины арми удаан яригдсан сөрөг давшилтаа өнгөрсөн сарын эхээр эхлүүлсэн юм.
Гэхдээ одоогоор багахан хэмжээний газар нутгийг Оросын цэргээс чөлөөлөөд байгаа. Сөрөг давшилтын удаашрал нь Оросын тал асар том газар нутгийг минажуулж, хүчтэй хориглолт байгуулсантай холбоотой гэж Киевийн эрх баригчид тайлбарлаж байна.
Өнгөрсөн долоо хоногт АНУ-ын зэвсэгт хүчний жанжин штабын дарга, генерал Марк Милли нэгэн арга хэмжээний үеэр ярихдаа Украины сөрөг давшилтыг бүтэлгүйтсэн гэж хэлэхэд хэтэрхий эрт байгаа бөгөөд уг үйл явц урт удаан үргэлжилж, их цус асгарахыг анхааруулсан юм.
Өчигдрийн уулзалтын үеэр Путин, Лукашенко нар Польш улс Украины баруун хэсгийг эзлэн авахаар санаархаж буй тухай дахин хэлэлцсэн байна.
“Украин, Польш улсуудын хооронд хагарал үүсгэх Путиний оролдлого нь түүний Украины дайнд бүтэлгүйтсэнтэй адил үр дүнгүй байх болно. Оросоос ялгаатай нь Польш, Украин хоёр түүхээсээ сургамж авч, Оросын империализмын эсрэг, олон улсын хууль дүрмийг зөрчихийн эсрэг үргэлж нэгдмэл байдаг” гэж Украины гадаад хэргийн сайд Дмитро Кулеба твиттер хуудсандаа бичжээ.
Эх сурвалж: AFP
