Голдуу Оросын жуулчдаас бүрдсэн 800 орчим зорчигчтой далайн аяллын Astoria Grande хөлөг өчигдөр өглөө Истанбулаас Гүржийн амралт зугаалгын Батуми хотод иржээ.
Хөлгийг Гүржийн иргэдийн эсэргүүцлийн жагсаал угтаж авсан байна. Жагсаалд оюутнууд, сөрөг хүчний намын төлөөлөл болсон 200 орчим хүн оролцжээ.
Тэд Украинд явуулж буй Оросын эзлэн түрэмгийлэх дайн, ерөнхийлөгч Путинийг шүүмжилсэн утгатай уриа лоозон барьж жагссан байна. Цагдаа нар тэднээс есөн хүнийг баривчлан саатуулжээ.
Долдугаар сарын 27-ны өдөр мөн Батуми болон нийслэл Тбилиси хотод олон зуун хүн эсэргүүцэн жагссаны улмаас Astoria Grande хөлөг төлөвлөсөн хугацаанаасаа өмнө боомтыг орхин явсан юм.
Хөлгийн нэг зорчигч 2008 онд Гүржид үйлдсэн Оросын эзлэн түрэмгийлэх дайныг зөвтгөж, үүнийг Абхазын ард түмнийг чөлөөлсөн явдал гэж үздэгээ Гүржийн хэвлэлд ярьснаас ийм эсэргүүцлийн жагсаал гарахад хүрч байжээ.
2008 оны дайны дараа Гүржийн нэг хэсэг байсан Абхаз салан тусгаарлагдсан юм.
Astoria Grande хөлөг дээр бас Украины дайныг дэмждэг Орос, Беларусийн урлаг соёлын одод зорчиж яваа нь тодорхой болсон байна.
Хоёр удаагийн эсэргүүцлийн жагсаалын дараа Astoria Grande хөлгийн оператор компани Батуми хотыг аяллын төлөвлөгөөнөөсөө бүрмөсөн хассан тухай Оросын РИА Новости агентлаг өчигдөр мэдээлжээ.
Тус оператор компани Оросын Сочи боомтоос Батумигаар дайруулан Истанбул хүртэл тогтмол аялал зохион байгуулдаг юм байна.
Эх сурвалж: Radio Free Europe
