Оросын хувийн зэвсэгт хүчний Вагнер группийн тэргүүн ирэх зургаан сарын дотор нэг бол алагдах, нэг бол дахин зэвсэгт бослого гаргах төлөвтэй байгааг нэгэн судлаач мэдээлжээ.
Эрэн сурвалжлах сэтгүүлзүйн нэр хүндтэй Bellingcat байгууллагын сэтгүүлч Христо Грозев ийм таамаг дэвшүүлж байгаагаа өчигдөр Financial Times сонинд ярьсан байна.
“Энэ оны нэгдүгээр сард би Пригожинийг зургаан сарын дотор Путиний эсрэг босно гэж хэлж байсан нь биелсэн” гэж Грозев ярьжээ. Пригожин болон Оросын батлан хамгаалах яамны удирдлагын хоорондын харилцаа хурцадсан баримтууд дээр тулгуурлан тэр ийм таамаг дэвшүүлж байсан гэнэ.
Грозев цааш нь ярихдаа “Оросын ерөнхийлөгч Путин түүнийг телевизээр урвагч гэж зарласан. Урвагчтай Путин яаж харьцдагийг бүгд мэднэ. Тэр түүнийг үхүүлэх хүсэлтэй байгаа. Зургаан сарын дотор нэг бол Пригожин үхнэ, үгүй бол тэр хоёр дахь удаагаа зэвсэгт бослого зохион байгуулна. Одоохондоо яг аль хувилбар хэрэгжих илүү магадлалтайг би хэлж чадахгүй байна” гэжээ.
Пригожиний богино настай бослого Кремлийн эрх баригчидтай тохиролцсоны үр дүнд өндөрлөсөн гэдэг.
Гэхдээ энэ тохиролцоо зөрчигдөх магадлалтай болсныг АНУ-д төвтэй ISW (Institute for the War) судалгааны хүрээлэн өнгөрсөн долоо хоногийн Лхагва гарагт гаргасан тайландаа өгүүлсэн байна.
Тохиролцооны дагуу Беларусьт шилжсэн Вагнерын олон зуун хөлсний цэрэг Орос руу буцаж эхэлсэн, тэд энэ сарын сүүлээр “идэвхжих” магадлалтай болсон тухай цуурхал тараад буйг ISW тайландаа дурджээ.
Беларусийн ерөнхийлөгч Лукашенко тус байгууллагыг санхүүжүүлэхээс татгалзсантай энэ нь холбоотой гэж Оросын болон Вагнертай ойр холбоотой эх сурвалжууд мэдээлж буйг энд тайлбарласан байна.
Вагнер группийг Оросын тал санхүүжүүлэх ёстой гэж Лукашенко үзэж байгаа гэнэ.
Ням гарагт нийтлэгдсэн Их Британийн батлан хамгаалах яамны ээлжит тайланд Оросын засгийн газар Вагнер группийн үйл ажиллагааг цаашид санхүүжүүлэх боломж муу байгаа тухай бичсэн байна.
Тиймээс Вагнер групп ямар алхам хийх нь одоо Кремлийн эрх баригчдын авах хариу арга хэмжээнээс хамаарах магадлалтай гэжээ.
“Хэрвээ Оросын эрх баригчид Вагнерыг санхүүжүүлэхээ больсон бол дараагийн хамгийн боломжит ивээн тэтгэгч нь Беларусь. Гэхдээ тус улс ингэвэл бүх нөөцөө шавхана” гэж Их Британийн батлан хамгаалах яамны өдөр тутмын тайланд бичжээ.
Эх сурвалж: Financial Times