Өчигдөр Москва орчмын шинэ төмөр замын нээлтэд оролцсон ОХУ-ын ерөнхийлөгч Владимир Путин тус улсын хамгийн том хоёр хотын хооронд өндөр хурдны төмөр зам байгуулах цаг болсон тухай ярьжээ.
“Москва, Санкт Петербургийн хооронд өндөр хурдны төмөр зам байгуулах төслийн талаар бид олон жил хэлэлцэж байгаа. Энэ бүтээн байгуулалтыг эхлүүлэхэд тохиромжтой цаг үе ирсэн гэж бид үзэж байна” гэж тэр хэлсэн байна.
Шинэ зам ашиглалтад орсны дараа сулрах одоогийн төмөр замыг ачаа тээврийн зориулалтаар ашиглах санааг Путин энэ үеэр дэвшүүлжээ.
“Ингэснээр ачаа тээврийн хурд бодитой нэмэгдэж, улс орны эдийн засагт чухал нөлөө үзүүлэх юм” гэж тэр тайлбарласан байна.
ОХУ-д одоогоор орчин үеийн өндөр хурдны төмөр замын тээвэр байхгүй юм. Зөвлөлт Холбоот Улсын үед 200 км/цаг хүртэл хурдтай төмөр замын тээврийн дэд бүтцийг байгуулах хоёр тусдаа туршилт хэрэгжиж байсан нь сүүлд зогссон тухай эх сурвалжууд мэдээлсэн байдаг.
Оросын Төмөр Зам нэгдэл Москва-Санкт Петербургийн чиглэлд өндөр хурдны төмөр зам байгуулах санааг 2010 онд анх танилцуулж байжээ.
Эх сурвалж: ТАСС
