Өрнөдийн Их Долоогийн бүлэгтэй өрсөлдөх зорилготой байгуулагдсан BRICS байгууллагын дээд хэмжээний чуулган энэ долоо хоногт Өмнөд Африкийн Бүгд Найрамдах Улсын (ӨАБНУ) Йоханнесбург хотод эхэлсэн билээ.
BRICS нь Бразил, Орос, Энэтхэг, Хятад, ӨАБНУ улсуудын эхний үсгүүдээр бүтээсэн нэр юм.
Хятадын төрийн тэргүүн Ши Жиньпин энэ долоо хоногийн Даваа гарагт чуулганд хүрэлцэн ирсэн. Гэтэл түүний Мягмар гарагт бизнесийн чуулганд оролцож үг хэлэх төлөвлөгөө нь тодорхойгүй шалтгаанаар цуцлагдсан байна.
Ши Жиньпиний хэлэх үгийг Хятадын худалдааны сайд Ван Вэньтао оронд нь уншиж танилцуулжээ.
Уг арга хэмжээнд BRICS-ийн гишүүн орнуудын төрийн тэргүүнүүд бүгд оролцсон юм. Тэр ч байтугай биеэр хүрэлцэн ирж чадаагүй ОХУ-ын ерөнхийлөгч Владимир Путин видео холбоогоор үг хэлсэн байна.
Харин орой нь болсон ӨАБНУ-ын ерөнхийлөгч Рамафозагийн хүндэтгэлийн зоогт тэр Энэтхэг, Бразилын ерөнхийлөгч нар болон Оросын гадаад хэргийн сайдтай хамт оролцжээ.
Ши Жиньпин яагаад чухал арга хэмжээг алгассан талаар Хятадын албаны эх сурвалжууд ямар ч тайлбар өгөхгүй байна. Харин ч оролцсон мэтээр мэдээндээ дурдсан юм.
Тухайлбал Шиньхуа агентлаг мэдээндээ энэ талаар огт дурдаагүй өнгөрсөн байна. Хятадын гадаад хэргийн яамны хэвлэлийн төлөөлөгч Хуа Чуньин сошиал хуудсандаа Ши Жиньпин чуулганд оролцож, үг хэлсэн мэтээр мэдээлэхдээ чуулганы танхимын ерөнхий гэрэл зургийг хавсаргажээ.
Лхагва гарагт болсон Хятадын гадаад хэргийн яамны долоо хоног тутмын хэвлэлийн хурлын үеэр өөр нэг хэвлэлийн төлөөлөгч Ван Вэньбин бас л энэ талаар сэтгүүлчдийн асуултад хариулахаас зайлсхийсэн байна.
“Хятад улсын голлох үүрэгтэй оролцдог олон улсын арга хэмжээнд төрийн тэргүүн оролцохгүй өнгөрөх нь онцгой ховор үзэгдэл юм” гэж Энэтхэг-Номхон далайн хөтөлбөрийн Герман Маршал Сангийн захирал Бонни Глэйзер ярьжээ.
“Ямар нэг хүчин зүйл чуулганыг алгасахад хүргэсэн бололтой. Эрүүл мэндийн асуудал, эсвэл анхаарал хандуулах шаардлагатай онцгой чухал үйл явдал байж болох юм. Бас чуулганы үйл явц, өрнөлтэй холбоотой өөр шалтгаан ч байж болно” гэж Олон Улсын Стратеги Судлалын Хүрээлэнгийн Хятадын төслийн судлаач Брайан Харт хэлсэн юм.
Тэрбээр цааш нь тайлбарлахдаа “Гэхдээ Ши чуулганы өмнө болон дараа болсон арга хэмжээнүүдэд оролцсоноос харвал алгасахад хүргэсэн ямар нэг онцгой чухал шалтгаан байсан бололтой байна. Одоогоор шалтгааныг мэдэх боломж алга” гэжээ.
Өнгөрсөн сард Хятадын гадаад хэргийн сайд Чинь Ганыг гэнэт огцруулсан талаараа Бээжингийн эрх баригчид ямар ч тайлбар өгөөгүй юм.
“Бээжингийн хаалттай байдал гайхмаар зүйл биш. Хэн нэг албан тушаалтны хувийн асуудал болон бусад эмзэг сэдвийн талаар мэдээллийн урсгалыг хатуу хязгаарладаг. Энэ удаагийн учир битүүлэг үйл явдал Бээжин “хар хайрцаг” болохыг дахин санууллаа” гэж Харт ярьжээ.
Эх сурвалж: CNN
