Өнгөрсөн шөнө Украины нисгэгчгүй онгоцнууд ОХУ-ын Псков хотын нисэх буудалд халдсан байна.
Агаараас хамгаалах систем дронуудын цохилтыг ямар нэг хохиролгүй няцаасан тухай орон нутгийн удирдлага эхлээд мэдээлжээ.
Харин сүүлд нисэх буудалд байсан дөрвөн ширхэг Ил-76 онгоц гэмтсэн тухай онцгой байдлын албаны эх сурвалж мэдээлснийг ТАСС агентлаг дамжуулсан байна.
“Дроны халдлагын улмаас дөрвөн Ил-76 гэмтсэн. Гал гарах үеэр хоёр онгоц шатжээ” гэж ТАСС мэдээлсэн байна.
Ил-76 бол Оросын армид өргөн ашиглагддаг ачаа тээврийн нисэх онгоц юм.
Оросын хэвлэлүүд нисэх буудлын тэнгэрт өтгөн хар утаа олгойдож буйг харуулсан дүрс, зургийг тарааж байна.
Псков хот нь Украины хилээс 800 км орчим зайд, Европын Холбооны гишүүн Латви, Эстони улсуудын хилд ойрхон оршдог.
Тус хот өмнө нь энэ оны тавдугаар сарын сүүлээр дроны халдлагад өртөж байжээ.
Өнгөрсөн шөнө бас Москва хотын Внуково олон улсын нисэх буудлыг хаасан байна.
Киевийн эрх баригчид дайны галыг Оросын нутаг дэвсгэрт буцааж авчрахаа амласны дараа сүүлийн нэг сар орчим хугацаанд Москва болон бусад хотууд Украины дроны цохилтын бай болох болсон юм.
Эх сурвалж: Reuters
