Энэтхэг улс албан ёсны англи нэрээ сольж магадгүй тухай яриа сүүлийн өдрүүдэд эрчимжсэн байна.

Тус улсын ерөнхий сайд Нарендра Моди колоничлолын үеэс үлдсэн өвийг устгах чиглэлд идэвхтэй ажилладаг. Харин энэ удаа олон улсад танигдсан улсынхаа албан ёсны нэрийг сольж магадгүй болсон гэнэ.

Тухайлбал “India” хэмээх нэрийг эртний сударт санскрит хэлээр бичигдсэн байдаг “Bharat” (Бхарат) нэрээр солих тухай яригдаж байна.

Энэ долоо хоногийн сүүлээр Энэтхэг улс Их 20-ын бүлгийн дээд хэмжээний чуулга уулзалтыг Дели хотод зохион байгуулах гэж байгаа.

Уг арга хэмжээнд оролцох зочдод илгээсэн хүндэтгэлийн зоогийн урилгад зохион байгуулагчийг “Бхаратын ерөнхийлөгч” гэж бичсэн байжээ.

Энэтхэгийн засгийн газар энэ сарын сүүлээр парламентын ээлжит бус чуулган хуралдуулах тов зарласан. Гэхдээ ямар асуудал хэлэлцэх талаар нууцалж байна. Нэр солих асуудал яригдаж болзошгүй гэсэн таамаг хамгийн их яригдах болжээ.

Энэтхэгийн эрх баригчид олон жилийн турш Британийн колоничлолын үед оноосон гудамж талбай, газар орны нэрсийг сольсоор ирсэн байдаг. Гэхдээ үндсэрхэг үзэлтэй Нарендра Модигийн засаглалын үед энэ үйл явц улам эрчимжсэн юм.

Британийн колоничлолоос гадна Моголын эзэнт гүрний үеийн исламын соёлын өвөөс ангижрах үйл явц ид өрнөж байгаа.

Долдугаар сард сөрөг хүчний намууд 2024 оны сонгуульд INDIA нэрийн дор эвсэж өрсөлдөх болсноо зарласан. INIDIA нь Indian National Developmental Inclusive Alliance гэсэн үгсийн товчлол юм.

Тиймээс улсын нэрийг солих Модигийн санаа нь давхар өрсөлдөгчдийнхөө давуу талыг устгах улс төрийн зорилготой гэж үзэх хүмүүс байна.

Эх сурвалж: AFP