Өнгөрсөн амралтын өдөр төв Европын Словак улсад парламентын сонгуулийн санал хураалт зохион байгуулагдсан юм.

Уг сонгуулиар ерөнхий сайд асан Роберт Фикогийн удирдсан Кремлийн бодлогыг дэмжигч Смер-СД нам хамгийн олон буюу 23 хувийн санал авч, эвслийн засгийн газар байгуулах эрхтэй болоод байна. Харин одоогийн эрх баригч Дэвшилтэт Словак нам 18 хувийн саналаар удаалсан юм.

Санал хураалтын өмнөхөн ОХУ-ын гадаад тагнуулын албаны дарга Сергей Нарышкин тус улсын дотоод хэрэгт АНУ-ын нөлөө нэмэгдсэн тухай хэвлэлд ярьж, эрх баригч Дэвшилтэт Словак намыг “Вашингтоны гар хөл” хэмээн нэрлэсэн юм.

Нарышкиний хэлсэн үгтэй холбогдуулан Словакийн гадаад хэргийн яам өчигдөр Братислав дахь ОХУ-ын элчин сайдад эсэргүүцэл илэрхийлжээ.

Эсэргүүцэлд “Словакийн чөлөөт, ардчилсан сонгуулийн шударга байдалд эргэлзсэн утгатай Оросын тагнуулын албаны худал хуурмаг мэдэгдлийг манай яам эрс эсэргүүцэж байна” гэж мэдэгдээд нийгэмд нь чиглэсэн худал мэдээлэл тараах ажиллагаагаа зогсоохыг Москвагийн эрх баригчдаас шаардсан байна.

Хариуд нь Братислав дахь ОХУ-ын элчин сайдын яам “Словакийн одоогийн зарим холбоотноос ялгаатай нь бид бусад улсын дотоод хэрэгт оролцдоггүй, төрийн эргэлт хийхийг санаархдаггүй” гэж мэдэгдсэнийг Оросын хэвлэлүүд мэдээлжээ.

Эх сурвалж: AFP