ДОХА, 2023 оны аравдугаар сарын 10 /Reuters/. Газын зурваст барьцаалагдаад буй Израилын эмэгтэйчүүд, хүүхдүүдийг Израилын шоронд хоригдож байгаа 36 палестин эмэгтэйчүүд, хүүхдүүдээр солилцох хэлэлцээнд Катар улс зуучилж байгаа тухай уг хэлэлцээний талаар мэдээлэл бүхий эх сурвалж Ройтерс агентлагт мэдээлжээ.
ХАМАС болон Израилын албаны хүмүүстэй зуучлах яриа хэлэлцээнд оролцож байгаа гэдгээ Катарын Гадаад хэргийн яам даваа гаргийн орой тус агентлагт баталсан байна.
Дээр дурдсан эх сурвалжийн мэдээлснээр, бямба гаргийн оройноос хойш үргэлжилж буй Катарын зуучлалын хэлэлцээ "нааштай урагшилж" байна. Уг хэлэлцээг АНУ-тай хамтран явуулж байгаа аж.
"Одоогийн байдлаар бид бүх талтай байнгын холбоотой байгаа. Бидний тэргүүлэх чиглэл бол цус урсгахыг зогсоох, хоригдлуудыг суллах, бүс нутагт мөргөлдөөнийг даамжруулахгүй байх явдал юм" гэж Катарын Гадаад хэргийн яамны хэвлэлийн төлөөлөгч Мажед Аль-Ансари Ройтерс агентлагт мэдэгджээ. Тэрбээр өөр дэлгэрэнгүй мэдээлэл өгөөгүй байна.
Харин Израилын албаны хүн "ямар ч яриа хэлэлцээ хийгээгүй" гэж Ройтерст мэдэгджээ. Исламын бүлэглэл өнгөрсөн бямба гарагт Израил руу дайралт хийж, тус улсын олон арван иргэнийг барьцаалсны дараа Катарын эрх баригчид Газын зурвас дахь ХАМАС-ын эрх бүхий хүмүүстэй холбоо тогтоосон тухай эх сурвалжууд мэдээлсэн байна.
Израилын шоронгоос 36 палестин иргэнийг суллах асуудлаарх хэлэлцээний талаар өмнө нь мэдээлээгүй билээ.
Газын зурваст барьцаалагдсан израилчуудын тоо мөн тодорхойгүй байгаа ч өнгөрсөн бямба гарагт ХАМАС бүлэглэл эмэгтэйчүүд, хүүхдүүд, өндөр настан, цэргүүдийг олзлон аваад байгаа юм.
Д.Одон
Эх сурвалж: "Монцамэ" агентлаг