Ням гарагт Дагестаны нийслэл Махачкала хотын нисэх буудалд гарсан Израилийн эсрэг үймээний буруутнаар Оросын эрх баригчид Украиныг нэрлэв.
Тухайн өдөр олон зуун хүмүүс нисэх буудалд дайран орж, Израилаас ирсэн онгоцноос жүүд хүмүүсийг буулгаж, шийтгэхийг оролдсон юм. ОХУ-ын гадаад хэргийн яамны хэвлэлийн төлөөлөгч Мария Захарова өчигдөр хийсэн мэдэгдэлдээ энэ үйл явдлыг гадаадаас зохион байгуулсан өдөөн хатгалга, гол тоглогч нь Украины эрх баригчид гэж үзэж байгаагаа илэрхийлжээ.
Уг мэдэгдлээс өмнө Кремлийн хэвлэлийн албаны дарга Дмитрий Песков бас энэ үйл явдлыг гадаадаас зохион байгуулсан гэж үзэж байгаагаа мэдэгдсэн юм.
Гэхдээ Захарова, Песков нарын хэн хэн нь ямар нэг нотлох баримт үзүүлээгүй байна.
Ойрх Дорнодод өрнөж буй үйл явдлыг Оросын нийгмийг талцуулахад ашиглах гэсэн Өрнөдийнхний оролдлогын талаар ерөнхийлөгч Путин албаныхантай хуралдахаар болсныг Песков энэ үеэр мэдээлсэн юм.
Зарим нь Палестины далбаа, зарим нь Израилийн эсрэг агуулгатай зурагт хуудас гартаа барьсан хэдэн зуун залуус Махачкалагийн нисэх буудалд хүч түрэн нэвтэрч буйг харуулсан дүрс бичлэгүүд Ням гарагийн орой сошиал сүлжээнд цацагдаж байв.
Тэд Израилаас ирсэн онгоц руу авирч, цонхыг нь хагалахыг оролдож байлаа. Онгоцноос буусан зорчигчдоос тэд жүүд хүн мөн эсэхийг нь асуун шалгааж байжээ. Зарим жүүд зорчигчид өөрсдийгөө муслим хэмээн хариулснаар эсэн мэнд гарсан тухайгаа хэвлэлд ярьсан юм.
ОХУ-ын дотоод хэргийн яам үймээн дэгдээгчдээс 60 хүнийг баривчилсан тухай Даваа гарагт мэдээлсэн байна.
“Утро Дагестан” нэртэй Телеграм суваг залуусыг үймээнд турхирсан гэж эрх баригчид дүгнэжээ. Сүүлд Кремлийн мэдээллийн хэрэгсэл 65,000 дагагчтай энэ сувгийг Оросоос дүрвэж, Киевт оршин суух болсон улс төрч Илья Пономаревтай холбоотойг мэдээлсэн юм.
Энэ сувгийг эзэмшихээ болиод жил гаруй хугацаа өнгөрснийг Ням гарагт Пономарев өөрөө мэдэгджээ.
Хамас-Израилийн дайн эхэлснээс хойш ОХУ-ын муслим хүн ам голлон суудаг Ар Кавказын бүс нутагт антисемитист үзлээ илэрхийлэх явдал хэд хэдэн удаа гараад байна.
Эх сурвалж: AFP