Аравдугаар сарын 7-ны өдөр Хамасын дайчид Израилийн нутаг дэвсгэрт халдах үеэр Германы 23 настай иргэн Шани Лук хэмээх эмэгтэй сураггүй болсон юм.

Тэрбээр тухайн үед Газын хилийн ойролцоо цөлд зохион байгуулагдсан хөгжмийн наадамд оролцож байжээ.

Тэгвэл энэ эмэгтэй Хамасынхны гарт алагдсаныг олж тогтоосноо Израилийн гадаад хэргийн яам Даваа гарагт зарласан байна.

Хамасын халдлагын эхний өдөр хөгжмийн наадамд оролцогчдоос 270 орчим хүн алагдсан юм.

Халдлагын дараахан террористууд Газын зурваст нэгэн залуу эмэгтэйг автомашины ачаан дээр тээвэрлэж явааг харуулсан дүрс бичлэг сошиал сүлжээнд тарж байв.

Шанигийн ар гэрийнхэн өвөрмөц шивээсээр тэр эмэгтэй охин нь мөн болохыг таньсан юм. Гэхдээ охин нь амьд байгаа гэсэн найдлага тасраагүй байлаа.

Израилийн мэргэжилтнүүд Газын зурвасаас олдсон гавлын ясыг шинжлээд сураггүй болсон эмэгтэйнх мөн болохыг тогтоожээ.

Эмэгтэйг халдлагын эхний өдөр алагдсан байх магадлалтай гэж тэд дүгнэсэн байна.

Аравдугаар сарын 7-нд гарсан халдлагын үеэр Хамасын зэвсэгт этгээдүүд Израилийн нутагт 1,400 гаруй хүний амийг хөнөөж, 239 хүнийг барьцаалсан юм.

Үүний хариуд Израилийн арми Газын зурвасыг олон өдөр бөмбөгдсөний дараа саяхан хуурай замын байлдааны ажиллагаа эхлүүлээд байна.

Өнгөрсөн хугацаанд Газын зурваст амиа алдсан палестин хүний тоо 8,300 хүрчээ.

Эх сурвалж: AFP