Оросын армийн хоёр цэрэг Украины эзлэгдсэн нутаг дэвсгэрийн Волноваха хотын нэг гэр бүлийн есөн хүний амийг бүрэлгэсэн хэргээр баривчлагджээ.
Хохирогсдын дотор бага насны хоёр хүүхэд байсан байна.
Аллага Баасан гарагийн шөнө гарч, цэргүүд дуу намсгагчтай пулемёт буугаар гэртээ унтаж байсан гэр бүлийн гишүүдийг хядсан тухай Оросын хэвлэлүүд мэдээлжээ.
Үүнийг Украины эзлэгдсэн нутаг дэвсгэрт гэмт хэрэг үйлдсэн цэргүүдээ Оросын хуулийн байгууллага баривчилсан анхны тохиолдол байж болзошгүй гэж ажиглагчид үзэж байна.
ОХУ-ын прокурорын алба баривчлагдсан цэргүүдийг Алс Дорнодоос ирсэн алба хаагчид гэж мэдээлжээ.
Аллагын шалтгааныг “гэр бүлийн маргаан зөрчил”-тэй холбоотой гэж урьдчилсан байдлаар сэжиглэж байгаа юм байна.
Оросын хэвлэлүүд, сошиал сувгуудаар цацагдсан хэргийн газрын гэрэл зурагт цусанд хутгалдсан цогцсуудыг харуулжээ. Тэдний зарим нь хоорондоо тэврэлдсэн байдалтай алагдсан байна.
Цэргүүдэд орон байраа өгөхөөс татгалзсан тул иргэн Капканецын гэр бүлийнхэн алуулсан гэж Украины албаныхан гэрчүүдийн мэдүүлэг дээр үндэслэн мэдээлжээ.
Украины засгийн газар уг хэргийг бас мөрдөн шалгаж эхэлсэн байна.
Хэрэг гарсан Волноваха нь зүүн Украины аж үйлдвэрийн хот бөгөөд 2022 оны хоёрдугаар сард дайн эхлээд удаагүй байхад Оросын цэрэгт эзлэгдэж байжээ.
Оросын эрх баригчид энэ дайны үеэр Украины энгийн номхон иргэдийн эсрэг аллага, харгислал үйлдсэнээ үргэлж үгүйсгэдэг.
ОХУ-ын ерөнхийлөгч Владимир Путин өмнө нь Буча тосгонд дайны гэмт хэрэг үйлдсэн цэргүүдийн эр зоригийг магтаж, одон медалиар шагнаж байв.
Мөн Украинд үйлдсэн хэргийнхээ талаар цэргүүд нийтэд дэлгэхийг Москвагийн эрх баригчид хатуу хориглодог. Тухайлбал өнгөрсөн онд Украинд алба хааж байхдаа энгийн иргэдийн амийг хөнөөсөн тухайгаа хэвлэлд ярьсан цэргийг Оросын шүүх зэвсэгт хүчний талаар худал мэдээлэл тараасан хэрэгт буруутган 5.5 жилийн тэнсэн харгалзах ял оноож байжээ.
Эх сурвалж: The Guardian