ОХУ-ын ерөнхийлөгч Владимир Путин 2030 он хүртэл үргэлжлүүлэн ажиллахын тулд 2024 оны гуравдугаар сард болох ерөнхийлөгчийн сонгуульд өрсөлдөх шийдвэрээ гаргасан тухай Ройтерс агентлаг албаны хэд хэдэн эх сурвалжаас уламжлан мэдээлжээ.
Тэрбээр 1999 оны сүүлээр Борис Ельцинийг залгамжилснаар Оросын түүхэнд Иосиф Сталинаас хойш хамгийн удаан төр барьсан хүн болсон юм. Путиний ерөнхийлөгчөөр ажилласан хугацаа Леонид Брежневийн засаглалын 18 жилийг ч даваад байгаа.
Тэрбээр аравдугаар сарын 7-ны өдөр 71 насанд хүрсэн юм.
Тэгвэл Кремлийн хэвлэлийн төлөөлөгч Дмитрий Песков дээрх мэдээлэлтэй холбогдуулан өчигдөр сэтгүүлчдэд тодруулга өгсөн байна.
“Ерөнхийлөгч энэ асуудлаар ямар ч мэдэгдэл гаргаагүй, ямар ч сонгуулийн кампанит ажил зарлаагүй байна” гэж тэр мэдэгджээ.
ОХУ-ын ерөнхийлөгчийн ээлжит сонгууль 2024 оны гуравдугаар сарын 17-ны өдөр болох төлөвтэй байгаа.
Оросын парламентын дээд танхим болох Холбооны Зөвлөл сонгуулийн санал хураах өдрийг ирэх сард эцэслэн тогтоох юм.
Энэ сонгуулиар Путинтэй хүчтэй өрсөлдөх нэр дэвшигч гарахгүй нь бараг тодорхой байна.
Гэхдээ Зөвлөлт Холбоот Улс задарснаас хойш Кремлийн удирдагчид хамгийн хүнд хэцүү сорилттой тулгараад буй цаг үед уг сонгууль зохион байгуулагдах гэж байгаа юм.
Украины дайн нь 1962 оны Кубын хямралаас хойш Орос, Өрнөдийн хооронд хамгийн гүнзгий зөрчил үүсгээд байна.
Энэ дайны улмаас Өрнөдийн орнуудын авсан хориг арга хэмжээ Оросын эдийн засагт цочрол үүсгээд байгаа.
Энэ дайнд Орос, Украины талаас олон зуун мянган цэрэг амиа алдсан нь 1979-1989 оны хооронд Афганистанд амссан Зөвлөлт Холбоот Улсын хохирлын хэмжээнээс хол даваад байна.
Эх сурвалж: Reuters, ТАСС
